Vava Adami yo Eva bavaikiswa muna mpatu a Edene, bawuta wana ayingi. Kaini wa mwan’au antete wakituka mvati a nsengo. Abele wa mwana wanzole wakituka mvungudi a mameme.

Lumbu kimosi, Kaini yo Abele bavana tukau kwa Yave. Nga ozeye kana nki i lukau? I lekwa kiamfunu kina tukayilanga o muntu. Yave wayangalela lukau lwa Abele. Kansi, kayangalela lukau lwa Kaini ko. Muna kuma kiaki, Kaini wafunga makasi. Yave walukisa Kaini vo makasi mandi malenda kumfila mu vanga diambu diambi. Kansi, Kaini kawila Yave ko.

Kaini wavovesa Abele vo: ‘Twenda kweto kuna kiana.’ Ekolo bakala yau nzole kaka kuna kiana, Kaini wanuanisa  mbunzi andi yo kumvonda. Adieyi Yave kavanga? Yave wayinga Kaini vana vazingila yitu yandi. Kaini kalendi diaka vutuka ko kuna kwazingilanga mase mandi.

Adieyi tulenda longoka? Ezak’e ntangwa e mambu ke mevangamenanga nze una tuzolele ko. Ediadi dilenda kutufungisa makasi. Avo tumwene vo makasi masakidi yovo muntu ankaka utulukisi mu kuma kia makasi tuna mau, vana vau tufwete sia ngolo mu kulula makasi. Avo ke wau ko, e makasi malenda wokela muna ntima yo kutuyala.

Abele muntu ambote kakala, watoma zolanga Yave. Muna kuma kiaki, Yave kalendi kumvilakana ko. Nzambi osinga futumuna Abele kimana kazingila ova ntoto vava ukituka se paradiso.