Hamulaho wa kuzwa mwa simu ya Edeni, Adama ni Eva nebabile ni bana babañata. Mwanaa bona wapili, yena Kaine naabile mulimi mi wabubeli yena Abele, naabile mulisana.

Zazi leliñwi, Kaine ni Abele baezeza Jehova matabelo. Kana mwaziba zesitalusa sitabelo? Ki mpo yeipitezi. Jehova naatabisizwe ki sitabelo sa Abele, kono naasika tabiswa ki sitabelo sa Kaine. Taba yeo neinyemisize hahulu Kaine. Jehova naalemusize Kaine kuli bunyemi bwahae nebuka tahisa kuli aeze lika zemaswe. Kono Kaine naasika teeleza.

Mwa sibaka sa kuteeleza, Kaine abulelela Abele kuli: ‘Haluye hamoho mwa naheñi.’ Hane bainzi mwa naheñi  banosi, Kaine alwanisa munyanaa hae ni kumubulaya. Ki lika mañi zanaaka eza Jehova? Jehova naafile Kaine koto ka kumuleleka kuli aye kwa sibaka sisili sa kwahule ilikuli asike aswalisana ni lubasi lwahae. Kaine naasike alumelezwa kukuta hape.

Ki lika mañi zelukona kuituta? Haiba lika halizamai molubatela lwakona kukala kuhalifa. Mi haiba lukala kuhalifa kamba haiba babañwi balueleza kuli lutuhele kuhalifa luswanela kuba ni buiswalo pili lusika halifa kale.

Bakeñisa kuli Abele naalata Jehova mi naaezize lika zende, Jehova ukazwelapili kumuhupula. Mulimu ukazusa Abele kwa bafu hakaeza lifasi kuba paradaisi.