Ba Adama ne Eva pa kupwa kutamba mu budimi bwa Edena, bābutwile bana bavule. Wabo mwana mubajinji mwana-mulume i Kaini, wāikele ke kidimye, ne wabo mwana wa bubidi mwana-mulume i Abele, wāikele ke mukumbi.

Difuku dimo, ba Kaini ne Abele bālambwile Yehova byamulambu. Le uyukile kyamulambu? I kyabuntu kyotupa Leza. Yehova wāsangedile kyamulambu kya Abele, inoko kāsangedilepo kya Kaini. Kino kyālobeje Kaini bininge. Yehova wādyumwine Kaini amba bulobo bobe busa kukulengeja ulonge kintu kibi. Inoko Kaini kātejejepo.

Kaini wānena Abele amba: “Twaya mu ntanda.” Pobāfikile mu ntanda mwa abo bene, Kaini wātamba’dyo mwanabo wāmwipaya. Le Yehova wālongele’po bika? Yehova wāpele  Kaini mfuto na kumupangila kulampe na kyabo kisaka. Kaini kādipo ufwaninwe kujoka nansha dimo.

Le kudi bufundiji botubwanya kwifunda’ko? Tubwanya kuloba shi bintu kebyendekelepo motwadi tusakila. Shi tubaivwana bulobo mu mutyima—nansha shi bakwetu abetudyumuna pa mwanda wa bulobo botudi nabo—tufwaninwe kwibutalula bukidibukidi pokebwetutādile.

Abele byaādi usenswe Yehova ne kulonga biyampe, Yehova umuvulukanga nyeke. Leza ukasangula Abele pakalamuna ntanda ke paladisa.