Bang’ ka Adam gi Hawa nosewuok e puodho mar Eden, ne ginyuolo nyithindo mang’eny. Wuodgi maduong’ ma niluongo ni Kain ne obedo japur, to Abel wuodgi mar ariyo nobedo jakwadh rombe.

Chieng’ moro, Kain gi Abel ne ochiwo ne Jehova misango. Be ing’eyo ni misango en ang’o? En mich makende. Jehova ne omor gi misango ma ne Abel ochiwo, kata kamano ne ok omor gi mar Kain. Mano ne omiyo Kain iye owang’ matek. Jehova ne osiemo Kain ni ich-wang’ ma ne en-gono ne nyalo miyo otim gima rach. Kain ne ok owinjo Jehova.

 Kar mondo Kain owe ich-wang’, en nonyiso Abel niya: ‘Bi wadhi e puodho.’ Ka koro ne gin kendgi e puodho, Kain nogoyo Abel mi onege. Jehova ne dhi timo nang’o? Jehova nokumo Kain kuom riembe mondo odhi odag mabor gi joodgi. Ne otamo Kain duogo dalagi chuth.

Ang’o ma wechegi puonjowa? Iwa nyaloga wang’ sama waneno ka gik moko ok timre kaka wadwaro. Sama wawinjo ka wach moro chako wang’o iwa, kata sama jomamoko osiemowa ni wawe ich-wang’, ber ka watimo lokruok mapiyo ka pok ich-wang’ omwomowa ma watimo gimoro marach.

Jehova wiye ok nyal wil gi Abel nikech Abel ne ohere kendo ne otimo gik mabeyo. Nyasaye biro chiero Abel mi obed mangima e kinde ma piny duto biro bedo paradiso.