Satepan ke Adán uan Eva kiskej itech xochital tein moajsia Edén, kinpiakej miakej konemej. Yekinika ininkonetsin motokaytij Caín. Yejua katka tatokkej. Ojpatika ininkonetsin motokaytiaya Abel, uan katka ichkatajpixkej.

Se tonal, Caín uan Abel kimakakej nemaktilmej Jiova. ¿Tikmati toni se nemaktil? Se netetayokolil tein se kimaka Dios. Jiova kiuelitak inemaktil Abel, sayoj ke amo kiuelitak inemaktil Caín. Yejua ika, Caín tel kualanik, uan Jiova kiluij: “Komo tiksentoka tikualantok, tikchiuas tein amo kuali”. Sayoj ke Caín amo kikakik.

Okachi kuali, Caín kiluij Abel: “Tiyouij ixtauat”. Keman ompa yetoyaj ininselti, Caín kiteuij iikniuj uan  kimiktij. ¿Toni kichiuak Jiova? Kitatsakuiltij Caín keman kititanik maj nemiti tel uejka. Amo kemanok ueliskia mokepas.

¿Toni techmachtia nejin? Komo amo mochiua tein tiknekiaj, xa tikualaniskej. Uan komo okachi tikualanij, oso komo oksekin kiitaj ke titelkualantokej, moneki niman timoyolseuiskej. Komo amo niman tikchiuaj tein moneki, tokualanyo uelis techuikas maj tikchiuakan tein amo tikixtalijtokej.

Abel kiteltasojtaya Jiova uan kuali monejnemiltij, yejua ika Jiova nochipa kielnamikis. Dios oksepa kimakas nemilis keman nejin taltikpak yeski se xochital.