Ádam dóó Íiv dáʼákʼeh Íídendę́ę́ʼ chʼízhníʼáázh bikéédóó tʼóó ahayóí haʼáłchíní hazlı̨́ı̨́ʼ. Áłtsé yizhchínígíí éí Kéin wolyé, éí kʼééʼdídléehii silı̨́ı̨́ʼ. Naaki góneʼígíí éí Éíbel wolyé, éí naʼniłkaadí silı̨́ı̨́ʼ.

Kéin dóó Éíbel, Jiihóvah bichʼįʼ nááʼjiisʼniiʼ. Nááʼjiiłniihgo éí haʼátʼíí óolyé? Ílı̨́įgo áʼjíléehgo óolyé. Éíbel nááyiisniiʼígíí Jiihóvah bił íílįįd, ndi Kéin nááyiisniiʼígíí éí Jiihóvah doo bił íílįįd da. Díí Kéin tʼáá íiyisí yikʼee báhóóchįįd. Áko Jiihóvah éí Kéin ííłní: ‘Tʼáá íiyisí náháchįʼgo éí doo ná yáʼátʼéeh da.’ Ndi Kéin éí doo akʼeh hojíłʼı̨́į da.

Ńtʼééʼ Kéin éí Éíbel kóyidííniid: ‘Hágo, dáʼákʼehgóó diitʼash.’ Áko tʼáá sáhí naaʼaashgo, dáʼákʼehgi Kéin bitsilí  yikʼiilwodgo yiyiisxı̨́. Dííshąʼ biniinaa Jiihóvah haazhdoonííł? Jiihóvah éí Kéin áátʼįįdígíí biniinaa bił kééhojitʼínę́ę bitsʼánínééh hodííniid. Kéin éí ákweʼé ninázhdooʼnéełgo doo bíighah da.

Kweʼésh naʼnitin hólǫ́? Łahda íiniidzinígíí doo nihíniikʼeh áhánééhgóogo da biniinaa niháháchįįh. Áháchįʼ nihide ááníiłgo—łahda éí yee nihaa ákoniizı̨́įʼgo áádóó nihił ííshjání íʼiilaago—tʼáá akǫ́ǫ́ hashtʼediilnííł, áko áháchįʼ doo nihee ádíhólníih da doo.

Éíbel éí Jiihóvah bił ílı̨́ dóó yikʼeh áánííł ńtʼééʼígíí biniinaa Jiihóvah tʼáá áłahjįʼ bénálniih doo. God éí nahasdzáán bikááʼ ayóó áhonóolnin ánáyiidlaago Éíbel hináago ánéidoodlííł.