Etyi Andau na Eva vatunda mo tyikunino tyo Endene, avakala novana. Omona wavo wotete Kaim, wakalele omulimi iya omona wavali Abele akala omunthita.

Onthiki imwe Kaim na Abele vaavele ovilikutila ku Jeova. Okuti ove wii oityi otyilikutila? Otyilikutila otyiawa tyimwe tyakolela. Jeova ahambukilwa otyilikutila tya Abele, mahi kahambukililwe otyilikutila tya Kaim. Otyo atyinumanesa Kaim. Jeova alondola Kaim okuti ankho utualako nonyengo malingi otyipuka otyivi. Mahi Kaim ketavelele.

No ngotyo, Kaim apopila Abele okuti: ‘Tuende kepia.’ Puetyi vekahi aveke kepia, Kaim autukila ondenge yae  emuipaa. Oityi Jeova alinga? Jeova atumu Kaim akakale kokule nombunga yae. Kaim kakondokele vali.

Oityi tulilongesila kuotyo? Pamwe ovipuka kaviende ngetyi ankho tuhanda iya otyo atyitunumanesa. Inkha tutala okuti onyengo ikahi nokukula momutima wetu—ine vakuetu vetulondola mokonda vaimbuka okuti tuanumana—tuesukisa okulinga liwa-liwa omapiluluko tyina nkhele onyengo yetu iheneliyawise.

Mokonda Abele ankho uhole Jeova nokulinga etyi tyaviuka, Jeova apeho umuhinangela. Huku makatutilisa Abele tyina amapilulula ohi aikala omphangu yombembwa.