Адам ӕмӕ Евӕ Едемы цӕхӕрадонӕй куы ацыдысты, уый фӕстӕ сын райгуырд бирӕ сывӕллӕттӕ. Сӕ фыццаг фырт Каин кодта зӕххы куыст, сӕ дыккаг фырт Авел та уыди фыййау.

Иу бон Каин ӕмӕ Авел Йегъовӕйӕн нывӕндтӕ ӕрхастой. Нывонд цы у, уый зоныс? Уый у, Хуыцауӕн кӕй скӕнынц, ахӕм лӕвар. Йегъовӕйӕн йӕ зӕрдӕмӕ Авелы лӕвар фӕцыд, Каины лӕвар та нӕ фӕцыд. Ӕмӕ уый тыххӕй Каин тынг смӕсты. Йегъовӕ Каинӕн загъта, мӕсты куы кӕна, уӕд уый ӕвзӕр хъуыддагмӕ кӕй ӕркӕндзӕн. Фӕлӕ йӕм Каин нӕ байхъуыста.

Каин Авелӕн загъта: «Цом-ма мемӕ быдырмӕ». Ӕмӕ иумӕ ацыдысты. Быдыры ӕндӕр ничи уыд, ӕмӕ Каин йе ’фсымӕр Авелы амардта. Цымӕ уӕд Йегъовӕ цы сарӕзта?  Каины бафхӕрдта – йӕ бинонтӕй йӕ дард кӕдӕмдӕр арвыста. Ӕмӕ Каинӕн уый бар нал уыд, цӕмӕй ма искуы йӕ бинонтӕм ӕрбаздӕхтаид.

Ацы хабарӕй цӕуыл ахуыр кӕнӕм? Цыдӕр, нӕхи куыд фӕнды, афтӕ куы нӕ рауайы, уӕд мах дӕр иуӕй-иу хатт смӕсты вӕййӕм. Зӕгъӕм, кӕмӕдӕр тынг мӕсты кӕнын райдыдтам кӕнӕ та уый чидӕр бамбӕрста ӕмӕ нын загъта, уый хорз кӕй нӕу. Уӕд куыд хъуамӕ бакӕнӕм? Хъуамӕ уайтагъд нӕ зондахаст фӕивӕм, цалынмӕ ӕвзӕрӕй ницы сарӕзтам, уӕдмӕ.

Авел Йегъовӕйы кӕй уарзта ӕмӕ, раст цы у, уый кӕй арӕзта, уый тыххӕй йӕ Йегъовӕ никуы ферох кӕндзӕн. Йегъовӕ Авелы райгас кӕндзӕн, зӕххыл дзӕнӕт куы скӕна, уӕд.