Eden huertapita yarqurirqa Adanwan Ëvaqa mëtsika wamrayoqmi kayarqan. Punta kaqpaqa Cainmi jutin karqan. Pëqa frütakunata y verdürakunatam muroq. Y qateqnin kaqpanam, Abel jutin karqan, y pëqa üshakunatam mitseq.

Juk kutim Cainwan Abel Jehoväpaq ofrendata rurayarqan. ¿Musyankiku ofrenda ima kanqanta? Tsëqa Diosta qoyanqan alläpa väleq qarëmi. Jehoväqa Abelpa ofrendampita kushikurqanmi, peru Cainpa ofrendanqa manam gustarqantsu. Tsëmi Cainqa alläpa cölerëkurqan. Peru “cölerashqalla kakurqa ima mana allitapis rurëkunkim” nirqanmi Jehoväqa. Tsënö nikaptinmi pëqa cäsurqantsu.

 Cainqa, “¿aku washa kinrëpa?” nirqanmi wawqin Abelta. Nïkurmi tsunyaqman pushëkur Abelta wanuratsirqan. ¿Y imatataq Jehoväqa rurarqan? Castigarmi, “familiëkipita mëtapis ëwakï” nirqan. Y ni imëpis manana kutinampaqmi nirqan.

¿Imatataq tsëqa yachatsimantsik? Imapis munanqantsiknö mana yarquptinqa itsa cölerakushun. Peru mas y mas cölerakïkanqantsikta cuentata qokurqa, o piñashqata pipis rikämashqaqa, imamampis manaraq charmi cölerantsikta dominanantsik y geniuntsikta cambianantsik.

Abelqa alläpam Jehoväta kuyaq y allim portakoq, tsëmi Jehoväqa pëta yarparëkan. Kë patsata shumaqyäratsirmi Jehoväqa Abelta kawaritsimunqa.