Edén huertamanta llujshishca qꞌuipaca Adán, Evaca achca huahuacunatami charirca. Punta churi Cainca allpapi trabajajmi carca. Qꞌuipa churi Abelca ovejacunata michijmi carca.

Shuj punllaca Cainpish Abelpish Jehová Diosmanmi ofrendata curcacuna. ¿Shuj ofrendaca imashi can? Diosman cuna regalomi can. Diosca Abel cushca ofrendataca cushicushpami chasquirca. Pero Cainpaj ofrendataca mana chasquircachu. Chaimi paica yallitaj pꞌiñarirca. Diosca, ‘pꞌiñarishpalla catishpaca mana allipimi urmangui’ nircami. Pero Cainca mana cazurcachu.

Ashtahuanpish Cainca Abeltaca chagramanmi pusharca. Paicunalla cashpaca Cainca Abeltaca huajtashpami  huañuchirca. Chaipica, ¿Diosca imatashi rurarca? Caintaca paipaj familiamanta llujshichishpami caruman causagrichun cacharca. Ña nunca mana tigrai pudircachu.

¿Imatataj yachacunchij? Huaquinpica imapish ñucanchij munashca shina mana llujshijpica pꞌiñarinchijchari. Pero pꞌiñarishca cashcata cuentata cushpa, o shujtajcuna pꞌiñarishcami cangui nijpica ñucanchij yuyaita, shungutapish utcami cambiana canchij. Mana cambiashpaca mana allicunapimi urmashun.

Abelca Diosta achcata cꞌuyaj, alli runami carca. Chaimantami Diosca paita yuyarishpa paraíso allpapi causachinga.