Adanwan Evaqa Eden huertamanta qarqurachikuspankum achka churi-wawayuq karqaku. Punta kaqmi karqa Cain, payqa chakrapi llamkaqmi karqa. Wawqinpa sutinñataqmi Abel, payñataqmi ovejata michiq.

Huk punchawmi Cainqa tarpusqan kawsayta Diospaq kañarqa. Abelñataqmi animalta kañapurqa. ¿Imapaqtaq kañapurqaku? Diosman quyta munaspankum. Jehova Diosqa Abelpa qusqantam chaskirqa. Cainpatañataqmi mana, chaymi Cainqa anchata piñakururqa. Chayna piñasqata qawaspanmi Jehova Diosqa nirqa: “Hinalla piñasqa kaspaykiqa, mana allintam ruwarunki”, nispa. Cainmi ichaqa mana kasukurqachu.

 Hinaspam Abelta nirqa: “Haku purikuq”, nispa. Chayna pusaruspanmi Cainqa maqaspan wawqinta wañurachirqa. Chaynapim Jehova Diosqa Cainta castigarurqa, ¿imaynata? Ayllunwan manaña tupananpaqmi karu-karuman ripukunanpaq nirqa.

¿Imatam Cainmanta yachachwan? Ima ruwasqanchikpas mana allin kaptinqa piñakuruchwanmi. Chayna piñasqallaña kasqanchikmanta musyakuruspaqa utaq pipas amaña piñakunanchikpaq niykuwaptinchikqa chayllam piñakuyninchikta saqinanchik, mana chayqa mana allintam ruwaruchwan.

Abelqa Jehova Diostam anchata kuyarqa, chayraykum Diosqa mana qunqanqachu. Kay allpa pacha huertayachisqaña kaptinmi Abeltaqa kawsarichinqa.