Jardín de Edenmanda llujshishca jipaca Adán y Evaca tauca huahuacunatami charirca. Paicunapa punda churica Cainmi carca. Paica frutacunata, verduracunata, granocunatami tarpun carca. Jipa churica Abelmi carca. Paica llamacunata michijmi carca.

Shuj punllaca, ‘Cainga pambapi fucushca granocunatami Diosman carangapaj apamurca’. ‘Cutin Abelca tucuilla llamacunamanda ashtahuan vira llamatami Diosman carangapaj apamurca’. ¿Diosman carana ima cajta yachanguichu? Shuj valishca regalota caranamandapash yali valishcami can. Jehová Diosca Abel carashcatami alicachirca. Shinapash Cainba carashcataca nalicachircachu. Chaimi Cainga ninanda culirarca. Chaimandami Jehová Diosca nirca, shina culira catishpaca imapash nalitami rurangui nishpa. Shina nijpipash Cainga na cazurcachu.

 Chai jipallami Cainga Abeltaca “jacu, pambapi purishun nishpa pusharca”. Ña paicunalla chaipi cashpaca, Cainga paipa huauquita huañuchishpami saquirca. Shina rurashcamandaca Jehová Diosca ¿imatata rurarca? Caindaca paipa familiapaman cutinga ama tigramuchunmi caru caruman cachashpa cashtigarca.

¿Imatata caimandaca yachajunchi? Imapash ñucanchi munashca shina na llujshijpica tal vez culiranchipashchari. Shinapash yapata culirajushcata cuenda japishpa o pipash yapatami culirajungui nijpica uchallami cambiana canchi. Shina rurashpallami culira mishachunga na saquishun.

Abelca Jehová Diosta tucui shunguhuan juyaimandami tucuipi cazurca. Chaitaca Jehová Diosca na cungangachu. Chaimandami cai alpata shuj juyailla paraisota rurashpaca Abel runagutaca causachinga.