Palo odova so o Adam hem i Eva ikljilje ando Eden, hine ljen but čhave. Oljengo prvo čhavo, o Kain, ulo zemljoradniko, a oljengo dujto čhavo, o Avelj, arakhlja bakren.

Jekh dive, o Kain hem o Avelj dindže žrtve e Jehovase. Da li džaneja soj tani i žrtva? Odova tano ked dela pe diso sar poklon e Devljese. Ked o Jehova dikhlja e Aveljesi žrtva ov radujindža pe, ama ked dikhlja e Kajinesi žrtva, ov na radujindža pe. Odoljese, o Kain but holjandža. O Jehova vačerdža e Kainese so ako nastavini te ovel holjamo, ka čerel diso lošno. Ama, o Kain na šundža lje.

Jekh dive, o Kain phendža e Aveljese: „Ava mancar ko polje.“ Ked reslje uduri, o Kain napadindža pe phralje  hem mudardža lje. So čerdža o Jehova sebepi odova? O Jehova kaznindža lje adžahar so bičhaldža lje dur andi oljesi porodica. O Kain na ismindža više te irini pe čhere.

So sikljovaja ando akava? Šaj ka počmina te holjana ako nane sa sar so amen mangaja. Ako dikhaja so amari holji ovela but bari, ja ako neko avela te vačeri amendže so hijam but holjame, tegani odmah valjani diso te čera angljeder so odola osećanja ka oven odobor bare so našti te kontrolišina ljen.

Odoljese so o Avelj manglja e Jehova hem čerdža odova soj tano šukar, o Jehova na bisterdža lje. O Jehova ka vazdel e Avelje ked i phuv paljem ka ovel raj.