После кода, сар о Адамо и Ева ужылэтар анда Эдемско садо, лэндэ арақаделэпэ бут бэятцэ. Лэнго пэрво шаво о Каино, залэласпэ ла ԥувьяса, ай о дуйто шаво, о Авелё диқэлас пала бакрэ.

Еқвар о Каино и о Авелё андэ́ лэ Иеговасти жертвы. Ту ӷанэс, со када жертва? Када подарко, саво анэн лэ Дэвлэсти. О подарко, саво андя о Авелё, чалеля лэ Иеговасти, ай кода, со андя о Каино, лэ Иеговасти на чалеля. Важ када о Каино фартэ холяйля. О Иегова ԥэндя лэ Каиности, сар во на парашэла тэ холявэл, во стерэла варисо найлашо. Но о Каино на кангля лэ Дэвлэс.

О Каино ԥэндя лэ Авелёсти: «Авэн поԥираса па мал». Кала вонэ слинэ екжэнэ, о Каино умардя лэ Авелёс.  Сар пэ када диқля о Иегова? О Иегова на ашадя када вся кадя. Во приԥэндя лэ Каиности тэ жувэл май дур лэ ерестар и тэ на рийпэ палпалэ.

Сости амэ сытювас? Кала варисо жал най кадя, сар амэ камас, амэ дэкала холявас. Кала амэ полас, кай лас тэ холявас или авэр ԥэнэн, кай амэ холинати, трэбуй йто тэ парашас тэ холявас. Важ кода кай анда холи амэ тераса варисо найлашо.

О Авелё любияс лэ Иеговас и кандэлас лэс. О Иегова никала када на бистрэла. Во рия лэ Авелёс каринг и жизня, кала пэ ԥув авэла раё.