Nanan’anaky maro Adama noho Eva lafa tsy tamy zariday Edena tao sasy. Kaina ty anakilahin-drozy voalohany. Mpamboly ie. Mpiaraky aondry Abela, anakilahin-drozy faharoe iny.

Nanao fanatitsy Kaina noho Abela ndraiky zay. Hainao va fanatitsy zao? Fanatitsy zao, sahala fanomeza manoka. Nahafalifaly ani- Jehovah ty fanatitsy nataoni-Abela, fa ty ani-Kaina tsy nahafalifaly azy. Neloky amy zay Kaina. Nampitandrina azy Jehovah hoe hahavy azy hanao raha raty helokiny io, fe tsy nidareany.

Vomaiky aza ie nitao ani-Abela. Hoy ty asany: ‘Ndao tsika ho an-tonda any.’ Lafa tany amy zay rozy, le nivangoani- Kaina zainy iny, le nimaty. Hainao va hoe ino ty nataoni-  Jehovah? Nisaziny Kaina. Niroasiny lavitsy any ie, le tsy mahazo moly amy mamany noho babany any sasy.

Ka ino ty ianarantsika baka amy zay? Mety heloky tsika lafa tsy manahaky ty ieritseretantsika azy ty raha sisany. Mety ho ambintsika na hovolanin’olo amintsika hoe fa manomboky meloky tsika. Laha zay ie, le tokony harenintsika malaky raha zay tsy no hahavy antsika hanao raha raty.

Tsy ho halinoni-Jehovah mihintsy Abela, satria nitea azy sady nanao raha soa avao. Hovelominy ndraiky ie lafa hataony paradisa tany toy.