Nda̱wa̱á rí Adán ga̱jma̱a̱ Eva nigájna̱án náa awúu̱n ixi̱ ri̱ʼi̱ Edén, niguáʼdiin mbaʼin e̱ji̱n. Bi̱ nixtáa ginii nigumbiʼyuu Caín. Ñajunʼ ndrígóo nindxu̱u̱ dí maʼdu xndú taun ga̱jma̱a̱ verduras. Bi̱ maʼni a̱jmi̱i̱n nigumbiʼyuu Abel, ikhaa ninindxu̱u̱ báxtúu.

Mbóo mbiʼi, Caín ga̱jma̱a̱ Abel nixnáá tsigijñaʼ Jeobá. Lá natayáá ndiéjunʼ nindxu̱u̱ mbá tsigijñaʼ ráʼ. Nindxu̱u̱ mbá regalo dí phú kiejunʼ rí nuxnáá Dios. Jeobá niniguuʼ tsigijñaʼ ndrígóo Abel, mú tániguuʼ ndrígóo Caín. Ikha jngó Caín nikiʼnáa wéñuʼ. Jeobá niʼthúu̱n: “Á mu nakiʼnán má xúʼko̱, nda̱wa̱á matani mbá dí ra̱májánʼ”. Mú Caín táʼnimbo̱o̱.

 Ikhú, Caín niʼthúu̱n Abel: “Ayi̱ mu̱ʼgua̱ xanáá”. Índo̱ ikhiin kuwa ndajkuíin, ikhú Caín nixnúu giʼtio̱o̱ ga̱jma̱a̱ nixiyáa. Ndiéjunʼ niʼni Jeobá rá. Nixnúu castigo Caín, niʼthúu̱n maʼga̱ mitsínguánʼ dí ni xátanga̱a̱ nditháan.

Ndiéjunʼ ejmañuluʼ rá. Á mu narígá tikhuaʼ dí ikháanʼ tsénigulú, mbáa makiʼnáanʼlu. Á mu nduʼyáá dí nakiʼnáanʼ má xúʼko̱, o á mu eʼwíínʼ nduyulú rí nakiʼnáanʼ me̱ndaʼkho, gíʼmaa muriʼkhumijná ga̱jma̱a̱ xákiʼnáanʼ wéñuʼ mu xúʼko̱ xúʼni̱ mbá dí ra̱májánʼ.

Abel nindoo kaʼyoo wéñuʼ Jeobá ga̱jma̱a̱ niʼni má xúʼko̱ dí májánʼ ikha jngó Jeobá marmáʼáan a̱jkiu̱u̱n kaʼyoo má xúʼko̱. Dios maʼnigabi̱i̱ índo̱ gáʼni̱i̱ ku̱ba̱ʼ mitsaan.