Adamu ndi Eva ŵati adikisika mumunda wa Edene, ŵenga ndi ŵana anandi. Mwana wawu wakwamba Kaini wenga mulimi ndipu wachiŵi Abelu, wenga muliska wa viŵetu.

Zuŵa linyaki Kaini ndi Abelu aperekanga sembi kwaku Yehova. Kumbi sembi ntchinthu wuli? Sembi ndi mphasu yakuzirwa. Yehova wangukondwa ndi sembi yo Abelu wangupereka kweni wangukondwa cha ndi sembi yaku Kaini. Ivi vinguchitisa kuti Kaini wakwiyi ukongwa. Yehova wangutcheŵeska Kaini kuti kukwiya kungamuchitisa kuti wachiti chinthu chiheni. Kweni Kaini wanguvwiya cha.

Kaini wangukambiya Abelu kuti: ‘Tiyi tiluti kumunda.’ Pa nyengu iyi ŵenga ŵija ndipu Kaini wanguyukiya muvurwa waki  ndi kumubaya. Kumbi Yehova watingi wachitengi wuli? Iyu wangulanga Kaini mwakumukambiya kuti wakaje kwakuyija, kutali ndi banja laki. Kaini wanguzomerezeka so cha kuwere ko kwajanga apapi ŵaki.

Kumbi isi tingasambiranjipu pa vo vinguchitika? Tingayamba kukwiya chifukwa chakuti vinthu vichitika mu nthowa yo isi tikhumba cha. Asani tiwona kuti tilutiriza kukwiya pamwenga anyidu atitcheŵeska kuti tayamba kukwiya, tikhumbika kusintha mwaliŵi techendachiti vinthu viheni.

Chifukwa chakuti Abelu wayanjanga Yehova kweniso wachitanga vinthu vamampha, Yehova wazakumuluwa cha. Iyu wazakumuyuska kuti wazije ndi umoyu pa nyengu yo wazamusintha charu kuja paradayisu.