Adamu na Hawa obu barugire omu rugonjo Adeni, bakazaara abaana baingi. Mutabani wabo ow’okubanza arukwetwa Kaini akafooka mulimi, kandi omwana wabo owakabiri arukwetwa Aberi akafooka muliisa.

Kiro kimu, Kaini na Aberi bakahongera Yahwe ebihongwa. Omanyire ekihongwa nikyo kiki? Nikyo kisembo eky’embaganiza. Ekihongwa kya Aberi kikasemeza Yahwe baitu ekya Kaini kitamusemeze. Ekintu kinu kikabihiza muno Kaini. Yahwe akahabura Kaini ngu ekiniga kye kikaba nikigenda kumuletera kukora ekintu ekibi. Baitu Kaini atahuliirize.

Omu kiikaro ky’okuhuliiriza, Kaini akagambira Aberi ngu: ‘Ija tugende hamu omu musiri.’ Obu bakaba bali bonka omu musiri, Kaini akatera mugenzi  we yamwita. Kiki Yahwe eky’akaba n’agenda kukorra Kaini? Yahwe akamufubira, yamubinga kuruga omu ka ey’owabu nukwo agende hara muno. Kandi akaba atarukugenda kwikirizibwa kugaruka.

Kiki ekiturukwega omu isomo linu? Nitusobora kukwatwa ekiniga kakuba ebintu birema kuba nk’oku turukugonza. Kakuba tuhurra ekiniga kitandikire kweyongera​—rundi kakuba omuntu atuhabura ngu tuleke kugira ekiniga kingi​—twine kuhinduramu bwangu nukwo tuleme ekiniga hatali ekiniga kutulema.

Yahwe naija kwikara naijuka Aberi habwokuba akaba ali muntu ayagonzaga Ruhanga kandi n’akora ebihikire. Yahwe obwaramara kufoora ensi orugonjo orurungi, naija kuhumbuura Aberi nauwe aikalemu.