Адам биле Ева Эдем садындан чорупкан соонда, хөй ажы-төлдүг апарган. Оларның бир дугаар оглу, Каин, чер болбаазырадып турган, а ийи дугаар оглу, Авел, кадарчы чораан.

Бир катап Каин биле Авел Иеговага өргүл эккелген. Өргүл дээрге чүү-дүр, билир сен бе? Ол дээрге Бурганга тускай белек-тир. Авелдиң өргүлүнге Бурган таарзынган, а Каинниң өргүлүнге таарзынмаан. Ол дээш Каин аажок килеңнээн. Иегова Каинни килеңнээрин соксатпас болза, бир-ле багай чүве кылып болурун сагындырган. Ынчалза-даа Каин ону дыңнаваан.

Каин Авелге: «Ховуже барып агаарлаалам» — дээн. Кажан олар ховуга ийилээ турда, Каин дуңмазынче халдай бергеш, ону өлүрүп каан. Иегова аңаа кандыг  хамаарылгалыг болган? Ол Каинни кезедип, өг-бүлезинден ырадыр чоргузупкан. Ол бажыңынче кажан-даа чанып болбас ужурлуг турган.

Моон чүнү өөренип ап болур бис? Бир-ле чүүл күзээнивис дег болбас боорга, хорадай берип болур бис. Хорадап эгелээш азы бир кижи хорадап турарывысты чугаалаар болза, ол-ла дораан оожургап алыр дээш кызар ужурлуг бис. Оон башка бир-ле багай чүүлдү кылып болур бис.

Авел Иеговага ынак болгаш ону дыңнап чораан. Ынчангаш Иегова ону кажанда-даа утпас. Ол Авелди чаа делегейге диргизиптер.