Kʼalal lokʼemikix ta tsʼumbil kʼinal te Adán sok Eva la staik bayal yal snichʼnabik. Te sbabial jaʼ te Caín sbiile. Te aʼtel ya spas jaʼ te ya stsʼun sit teʼetik sok bok-itajetik. Te schebal yal snichʼnabik jaʼ te Abel sbiile, jkanantuminchij te yaʼtele.

Ta jun buelta, te Caín sok te Abel la yakʼbeyik chikʼbil majtʼanil te Jehová. ¿Yabal anaʼ bin-a te chikʼbil majtʼanile? Jaʼ jun majtʼanil te ya yichʼ akʼel ta stojol te Diose. Te Jehová lek la yil te majtʼanil yuʼun te Abele, yan te majtʼanil yuʼun te Caín ma lek la yil. Jaʼ yuʼun bayal ilin te Caín. Te Jehová jich la yalbey: “Teme ma xa akom te awilinba, ay bin chopol ya xjuʼ ya apas”. Pero maba la yichʼ ta mukʼ te bin la yichʼ albeyele.

Te bin la spas te Caín jaʼ te la yalbey te Abel: “Konik ta akiltik”. Te kʼalal stukel ayikix-ae, te Caín la stsak te  yijtsʼin sok la smil. ¿Bin la spas te Jehovae? La yakʼbey kastigo te Caine, jaʼ te namal tikunot bael ta stojol te sfamiliae. Maʼyukix bin-ora ya xjuʼ ya sujt tal.

¿Bin ya jnoptik yuʼun-abi? Teme ay bin ma jichuk ya xkʼot ta pasel te bitʼil ya jkʼantike, yaniwan x-ilinotik. Teme ya xtoyxan te kilinbatik o teme ay skʼajkʼal koʼtantik ya yilotik te yantike, yame skʼan ya jeltay te jtaleltik. Teme ma jkom jbatik ta oranax ya xjuʼ ya swentainotik te bin ma lek ta pasele.

Te Abel kʼux ta yoʼtan te Jehová sok lek la yakʼ ta ilel stalel, jaʼ yuʼun te Jehová spisil-ora ya snaʼulan. Te Dios ya xchaʼyakʼbey skuxlejal te kʼalal ya spas ta nichimal kʼinal te Balumilale.