NGUDO 4
U Sinyuwa Zwo Ita Uri A Vhulahe
Musi Adamu ana Eva vho no bva tsimuni ya Edeni, vho beba vhana vhanzhi. Ṅwana wavho wa mutukana wa u thoma Kaini, o vha mulimi nahone ṅwana wa vhuvhili wa mutukana Abele, o vha mulisa.
Ḽiṅwe ḓuvha Kaini na Abele vho itela Yehova zwiṱhavhelo. Ni a ḓivha uri tshiṱhavhelo ndi mini? Ndi tshifhiwa tsho khetheaho vhukuma. Yehova o takalela tshiṱhavhelo tsha Abele, fhedzi a sa takadzwe nga tsha Kaini. Zwenezwo zwo ita uri Kaini a sinyuwe vhukuma. Yehova o sevha Kaini uri u sinyuwa hawe hu nga ita uri a ite zwithu zwo vhifhaho vhukuma. Fhedzi Kaini ho ngo thetshelesa.
Nṱhani hazwo, Kaini o ri kha Abele: ‘Kha ri ye masimuni.’ Musi vhe vhavhili masimuni, Kaini o vutshela murathu wawe
nahone a mu vhulaha. Yehova o vha a tshi ḓo ita mini nga hazwo? Yehova o pfisa vhuṱungu Kaini nga u mu pandela uri a ye u dzula kule na muṱa wa hawe. Kaini ho ngo tsha dovha a tendelwa u vhuya.Riṋe ri guda mini kha zwenezwi? Ri nga sinyuwa musi zwithu zwi sa tshimbili nga nḓila ine ra ṱoḓa ngayo. Musi ri tshi pfa uri ri khou thoma u sinyuwa—kana vhaṅwe vha tshi ri eletshedza ngauri vha vhona ri tshi khou thoma u sinyuwa—ri tea u langa maḓipfele ashu nga u ṱavhanya ri sa athu u tshinya.
Nga ṅwambo wa uri Abele o vha a tshi funa Yehova nahone a tshi ita zwo lugaho, Yehova u ḓo dzula a tshi mu humbula. Yehova u ḓo vusa Abele musi a tshi ita uri ḽifhasi ḽi vhe paradiso.
“U thome u ye u ite mulalo na wahau, nga murahu u kone u ṋekedza tshifhiwa tshau.”—Mateo 5:24