Han ginpaiwas na hira Adan ngan Eva ha garden han Eden, nagkaada hira damu nga anak. An ira suhag nga hi Cain nagin parauma; an sumunod, hi Abel, nagin paraataman hin karnero.

Usa ka adlaw, hira Cain ngan Abel naghalad kan Jehova. Maaram ka ba kon ano an halad? Usa ito nga espesyal nga regalo. Nalipay hi Jehova ha halad ni Abel, pero waray hiya malipay ha halad ni Cain. Salit nasina gud hi Cain. Ginpahamangnoan hiya ni Jehova nga puydi hiya makabuhat hin maraot tungod han iya kasina. Pero waray hiya mamati.

Lugod, nagsiring hi Cain kan Abel: ‘Kadto kita ha uma.’ Pag-abot nira didto, gin-atake ni Cain an iya bugto ngan ginpatay. Ano daw la an hihimoon ni Jehova kan Cain? Ginsirotan hiya ni Jehova;  ginpaiwas hiya ngadto ha lugar nga hirayo gud ha iya pamilya. Diri na gud hiya puydi bumalik.

Ano nga leksyon an aton mahibabaroan? Bangin masina kita kon diri nasusunod an aton karuyag. Kon naabat kita nga nagtitikaduro an aton kasina​—o kon may nagpahamangno ha aton kay nakita nira nga nasisina kita—​sadang kita gumios dayon ngan kontrolon an aton emosyon antes kita makontrol hito.

Tungod kay hinigugma ni Abel hi Jehova ngan nagbuhat hiya hin husto, diri gud hiya hingangalimtan ni Jehova. Babanhawon han Dios hi Abel kon himoon na Niya an tuna nga paraiso.