Ka tsʼoʼok u jóoʼsaʼal Adán yéetel Eva tu jardinil Edeneʼ, anchaj yaʼab u paalaloʼob. Le yáax paaloʼ tu kʼaabaʼtaj Caín. U meyaj kaʼacheʼ u pakʼik frutaʼob yéetel verduraʼob. Le u kaʼatúul paaloʼ tu kʼaabaʼtaj Abel, letiʼeʼ ku kanáantik kaʼach tamanoʼob.

Junpʼéel kʼiineʼ Caín yéetel Abeleʼ tu tsʼáajoʼob ofrendaʼob tiʼ Jéeoba. ¿A wojel wa baʼax junpʼéel ofrenda? Lelaʼ junpʼéel baʼax ku siʼibil tiʼ Dios. Tiʼ Jéeobaeʼ maas utschaj tu yich le baʼax siʼibtiʼ tumen Abeloʼ, chéen baʼaleʼ maʼ maʼalob tu yilil le tsʼaʼabtiʼ tumen Caínoʼ. Le oʼolal Caíneʼ jach pʼuʼuji. Jéeoba túuneʼ tu yaʼalajtiʼeʼ wa ku seguer u pʼuʼujuleʼ jeʼel u beetik baʼax kʼaaseʼ, chéen baʼaleʼ letiʼeʼ maʼ tu yuʼubaj tʼaaniʼ.

Caíneʼ tu yaʼalaj tiʼ Abel: ‹Koʼox xíimbal teʼ kʼáaxoʼ›. Le tiaʼanoʼob tu juunaloʼoboʼ, Caíneʼ tu nóokjatsʼtaj u yíitsʼineʼ  ka tu kíimsaj. ¿Baʼax túun tu beetaj Jéeoba? Tu castigartaj Caín, ka tu túuxtaj kajtal náach tiʼ u láakʼtsiloʼob. Maʼ kun páajtal kaʼach u kaʼa suut tu yiknaloʼob.

¿Baʼax ku kaʼansiktoʼon lelaʼ? Maʼ xaaneʼ jeʼel k-pʼuʼujul wa maʼ tu jóokʼol maʼalob le baʼax k-kʼáat k-beetoʼ. Chéen baʼaleʼ wa k-uʼuyik bey táan k-maas pʼuʼujul bey xan wa ku yaʼalaʼaltoʼon chíikaʼan jach tsʼoʼok k-pʼuʼujuleʼ, kʼaʼabéet k-ilik maʼ u seguer k-uʼuyikba beyoʼ, tumen jeʼel u túulchʼintkoʼon k-beet baʼax kʼaaseʼ.

Abeleʼ jach u yaabiltmaj kaʼach Jéeoba yéetel tu yuʼubaj tʼaan, le oʼolal maʼ kun tuʼubsbil tumen Jéeoba. Yaan u kaʼa kuxkíintaʼal ken suʼutuk le Luʼum junpʼéel paraísooʼ.