Después ni Adán né Eva bireʼyibu lainy lagary móz ni góc laa Edén goyoʼ xidal xiinyibu. Xiin lagolbu góc laa Caín. Láabu bunybu dxiin ló layoo, goloʼbu binii né bisagaʼbu stipnés cós ni roo buñ. Stoib xiin Adán góc laa Abel, láabu gonbu xilieen.

Toibtica dzú Caín né Abel bunyibu toib ofrenda par Jehová. ¿Nanlo xí ngú toib ofrenda la? Nacni toib galrrascad par Dios. Jehová bioladxbu ni Abel biscad láabu, per diti bioladxbu xcalrrascad Caín. Por ngú Caín nigolú bidzuitz né Jehová góoch láabu: «Pal diti rachoclo ló xcalnadzuitzlo ndeʼ siné looy gonylo cós mal». Per Caín diti bicadiagbu Jehová.

Xalagary ngú, Caín gochbu Abel: «Tzoʼno laidy dainy». Órni ma goyoʼyibu guiropsibu laidy dainy,  Caín godimbu né dada bigaitybu buchbu. ¿Xí buny Jehová ór cú? Buny castigarbu né bilaʼkbu Caín de ronoʼ xfamily, né dipa labúu nabiguetbu.

¿Xí rasuidyni lóono? Sigory sadzuitzno pal toib cós diti rac xomod nainy lóono. Pal raduidyno cuent que diti raroc ló xcalnadzuitzno o noʼ ni raiby lóono que rien que cadzuitzno, nimaca non guichocno loni par diti gonyno cós mal.

Abel nigolú gondxiʼbu Jehová né bunybu cós tzaay, por ngú Jehová dipa sialadx láabu. Dios salís láabu lad gueʼet órni gonybu Gudxlio reʼ toib lagary móz.