Kinde ma oro ubekadhu, dhanu ugam unyai lee dit iwi ng’om. Ju ma dupa gibed gitimo lembe ma reco, man jumalaika moko de gicaku timo lembe ma reco. Giweko kabedo migi i polo, man giloro iwi ng’om. Pirang’o? Gibino i ng’om kara girony kum mi dhanu man gigam mon.

E jumalaikane gigamu mon, man ginyolo kugi awiya. Saa m’awiyane gidondo, gidoko jurukara man gibino dhanu ma kwiny. Gibed gisendo dhanu lee dit. Yehova umito ngo ewek lembe maeno umedere asu, e enwang’u nia kwayu eketh pii upong’ man unyoth dhanu ma gibetimo lembe ma reco.

Re ng’atu moko acel ubino ku timo m’ukoc ku mi jumange. Emaru Yehova. Nyinge bino Noa man giku min ot pare ginyolo awiya ma co adek; nying’gi Cem, Ham, man Yafeth. Gin adek zoo mon migi bino nuti. Yehova uwacu ni Noa nia egier avur ma dit kara kud githo ku juruot pare i pii ma dit ma bipong’o ng’om. Avur utie ve sondu moko ma dit ma copo lierere iwi pii. Yehova uyero bende ni Noa nia eroi kwond lei ma tung’ tung’ i avur kara kud githo.

Wang’ acel Noa ucaku giero avur. Noa karacelo ku juruot pare gigiero avur pi oro ma romo 50. Gigiero Avur tap calu ma Yehova unyutho igi. I kind saa maeca, Noa ubed upoyo bende dhanu nia pii ma dit bipong’o ng’om. Re ng’atu moko acel de mbe m’uwinje.

E saa ugam uromo pi nimondo i avur. Wakenen lembe m’ugam utimere.