Tiempompejja jaqenakajj wal aka oraqen mirantjjäna. Jilapartejj jan wali jaqenakäpjjänwa. Yaqhep angelanakas jan walinakwa lurapjjäna. Alajjpachatwa aka oraqer saraqanipjjäna. ¿Kunatakis saraqanipjjpachäna uk yattati? Jaqer tukusin warminakampi casarasiñatakiw saraqanipjjäna.

Jupanakan wawanakapajj wali chʼamani, wali nuwasiri ukhamaw jilsupjjäna, jaqenakarus jan walinak lurapjjäna. Jehová Diosajj janiw ukhamak uñchʼukkänti. Ukatwa jan wali jaqenakar Uma Juiciompi tukjäna, aka oraqe phoqantañkamaw jallojj wal purintäna.

Ukampis mä suma jaqew utjäna, jupajj Jehová Diosar wal munasïna, Noé satänwa. Jupajj mä esposani kimsa yoqanakani ukhamänwa. Yoqanakapajj Sem, Cam, Jafet satäpjjänwa. Sapa mayniw warminirakïna. Diosajj mä arca lurañapatakiw Noé chachar mayïna, ukasti mä jachʼa cajonar uñtatänwa, umanwa tuyuñaparakïna. Ukhamatwa Noempi familiapampejj Uma Juiciot salvasipjjañapäna. Ukatjja Diosan mayitaparjamajj kunayman animalanakwa salvasipjjañapatakejj uka arcar anantañapäna.

Noé chachajj jankʼakiw uka arca lurañ qalltäna, 50 maranakatwa familiapampejj tukuyapjjäna, kunjamtï Jehová Diosajj siskäna ukarjamaw lurapjjäna. Ukañkamajja, Noé chachajj Uma Juiciotwa jaqenakar yatiyäna, ukampis janiw khitis istʼañ munkänti.

Arcar mantjjañataki horasajj purinjjänwa. ¿Ukjjarojj kunas pasäna uk yatiñ munasmati?