Lam leleng, lam godang ma jolma di tano on. Alai, umgodang do halak na jahat. Jala adong do suru-suruan manang malaikat na di surgo na gabe jahat. Ditinggalhon nasida do surgo, jala ro tu tano on. Diboto ho do boasa diulahon nasida i? Asa boi nasida gabe jolma jala kawin tu borua.

Adong ma gelleng ni nasida. Dung balga, mansai gogo do gelleng ni nasida jala jahat. Sogo do roha ni Jahowa mangida i. Alani i, marjanji ma Jahowa laho mambahen aek na sumar, asa mate nasida.

Alai adong do sahalak baoa na burju. Goarna si Noak. Holong do rohana tu Jahowa. Adong do keluargana, sada istrina dohot tolu gellengna. Goar ni anakna, si Sem, si Ham dohot si Japet. Adong do muse tolu parumaenna. Disuru Jahowa ma si Noak mambahen sada parau, asa boi ibana dohot keluargana malua sian Aek na Sumar i. Mansai balga do parau i jala boi mumbang di aek. Disuru Jahowa ma muse si Noak pamasukkon angka binatang tu parau i, asa tongtong mangolu.

Pintor dibahen si Noak do parau i. Hira-hira 50 taon ma si Noak dohot keluargana mambahen parau i. Diulahon nasida do sude na didok Jahowa laho mambahen parau i. Jala dipaboa si Noak do tu angka halak na laho ro nama Aek na Sumar. Alai ndang adong na olo mambege.

Ujungna dapot ma tingkina, masuk ma nasida tu parau i. Aha ma na masa tu angka halak i?