LEKSIÓUN 5
Ladügün Noé aban árüka
Lau lásügürün dan, aba hagibedagun gürigia ubouagu. Wuribatiña meha hiibe-agei. Aba meha giñe haribadun saragu ánheligu. Raritiña siélugiñe, le ñein lubéi meha hawinwanda, lun hayabin ubouagun. Subuditi bun ka lan uagu? Lun ítara lan hágubu kei wügüriña lun hamarieidun hama würiña.
Aba meha gasaanigu hamá ánheligu hagía hau würiña. Dan haweinamudunbei hasaanigu, wéiriti meha here ani furundetiña, adügatiña meha bandi katei wuribati houn gürigia. Mígirunbei meha Heowá lun lasigirun katei ítara. Ligía desidírü lubéi lagumuchun hau lau lóunahan aban guran o huya héreti lun labuinchun ubóu lau duna.
Anihein meha aban wügüri le mítaranti kei ha híbiri gürigia ladüga hínsiñe lan Heowá lun. Noé meha líribei. Gániti meha Noé weiriou ani ǘrüwañanu meha lisaanigu: Semü, Kamü luma Hafeti. Gániti meha giñe kada lisaani aban weiriou. Ariñagati Heowá lun Noé lun ladügün aban árüka, aban óunwenbu gafu to lautu fulansu to gayaraabei táfayarun ligibuagu duna. Ítara, gayaraabei meha lesefurun Noé hama liduheñu danme ladagarun Guran. Ariñagati giñe Heowá lun Noé lun lebelaagüdün saragu animaalugu tidoun árüka lun gayara lanhasalbarun.
Gumeseti Noé adügoun árüka lau lóufudagun. Barüti Noé hama liduheñu kéiburi 50 irumu awadigimarida tuagu árüka ani adüga hamutu kei lariñaguni Heowá houn. Sügüti Noé saragu irumu eweridiraña gürigia luagu anite lan meha Guran, úatiña adügütiña gasu lau.
Aba lachülürün dan lun hebelurun tidoun árüka. Busentibu basubudiruni ka lan asuseredubei lárigiñe?
“Ítara kei meha lasuseredun lidan meha lidaani Noé, ítara luba giñe danme le niabin, au le Wügüri Garaüwarügüti” (Matéu 24:37).
Háfuga hínsiñebei lan giñe le hun
BIDEU BURÍ
Wínwanti meha Noé kei labusenruni Bungiu
Haganagua meha gürigia fásitiña ani gáfarahatiña lawinwanda Noé, ligía lóunahanbei Bungiu aban óunwenbu guran ubouagun. Gaganbaditi Noé lun Bungiu, ítara liña líchugun aban buiti hénpulu woun. Lidan bidéu le, bafurendeirubei ida liña lan líderaguniwa lau laganbadi.
