WASE 5
Na Waqa i Noa
Toso na gauna, sa levu na lewe i vuravura. Levu e ca na nodra ivakarau, wili tale ga kina eso na agilosi mai lomalagi. Era biuta nodra itikotiko mera gole mai vuravura. O kila na vuna? Era vukici ira mera tamata ra qai vakawatitaki ira na yalewa.
E sucu na luvedra tagane na agilosi qo. Era kaukaua nira tubu tiko, era dauveivakalolomataki, era veivakamavoataki tale ga. Ena sega ni vakatara o Jiova me yaco tiko qo, mani vakarusai ira na tamata ca ena waluvu.
Ia e duidui sara e dua na turaga e dau lomani Jiova, na yacana o Noa. E vakawati, e tolu na luvena tagane: o Semi, Ame, kei Jefeca. E tiko na dui watidratou. E kaya vei Noa o Jiova me taya e dua na waqa levu me ratou bula kina vakavuvale ena Waluvu. Qo e dua na kato vakaitamera e rawa ni ciri. E kaya tale ga vei Noa o Jiova me vakavodoki e levu na manumanu me rawa nira bula.
Sega tale ni wawa o Noa ni sa tekivu taya na waqa. E rauta ni 50 na yabaki nodratou taya tiko vakavuvale na waqa qo. Ratou cakava me vaka sara ga e kaya o Jiova. Gauna vata qori, e vakasalataki ira na tamata o Noa me baleta na waluvu. Ia era sega ni vakarorogo.
Sa kena gauna me ratou vodo kece i waqa. Meda raica mada na ka e qai yaco.
“Na gauna ena tiko kina na Luve ni tamata ena vaka ga na siga i Noa.”—Maciu 24:37
Rawa ni o Wilika Tale ga
YACA ENA IVOLATABU
Qito Vakaivolatabu me Baleti Noa
O kila na yacadratou na luvena tagane o Noa? Vulica eso tale na ka me baleti Noa kei na nona vuvale.
ITALANOA VAKAIVOLATABU
E Vakabauta na Kalou o Noa
Ena veidusimaki ni Kalou, e tara na waqa o Noa me vakabula na nona vuvale mai na Waluvu. Na cava o vulica me baleta na vakabauta ena italanoa kei Noa kei na Waluvu?
