Imwina riki, a a bati aomata i aon te aba. Angina a boni buakaka. A a moanna naba ni buakaka anera tabeman i karawa. A kitana mwengaia i karawa ao a ruo nako aon te aba. Ko ataia bwa e aera ngkai a karaoa aei? Bwa a aonga ni karikiia n aomata ao ni karekeia buuia.

A karikiia natiia mwaane anera ma aine aikai. A ikawairake ataei aikai ao a rangi ni korakora ao n iowawa. A kaikoakiia aomata. E aki kariaia Iehova bwa a na teimatoa n riki mwakuri aikai. Ngaia are e a baireia bwa e na kamaunaia aomata aika buakaka n te ieka.

Ma iai te mwaane temanna ae kaokoro arona. E tangira Iehova. Arana bon Noa. Iai buuna ao teniman natina mwaane aika Tem, Am, ao Iabeta, ao iai buuia natina aikai. E tua Iehova nakon Noa bwa e na kabaa te aake ae totoa bwa e aonga ni kamaiuaki ma ana utu n rokon te Ieka. Te aake bon te bwaoki ae totoakaei ae kona ni beti i aon te ran. E tua naba Iehova nakon Noa bwa e na karinia maan aika bati n te aake bwa a aonga ni kamaiuaki naba.

E aki tabwara Noa ma e a moana naba kabaan te aake. E karaoia ma ana utu tao i nanon 50 te ririki. A karaoia raoi n aron tuangaia iroun Iehova. N te tai anne, e kauringia aomata Noa taekan te Ieka, ma akea temanna ae kan ongo.

N tokina ao e a boo te tai n rin n te aake. Ti na nora te bwai ae riki imwina.