ISI NKE 5
Ụgbọ Noa
Ka oge na-aga, a bịara nwee ọtụtụ mmadụ n’ụwa. Ọtụtụ n’ime ha na-eme ihe ọjọọ. Ụfọdụ ndị mmụọ ozi bi n’eluigwe bidokwara ime ihe ọjọọ. Ha hapụrụ eluigwe bịa biri n’ụwa. Ị̀ ma ihe mere ha ji bịa biri n’ụwa? Ọ bụ ka ha nwee ike ịghọ mmadụ ma lụrụ ụmụ nwaanyị.
Ndị mmụọ ozi ndị ahụ na ụmụ nwaanyị ha mụtara ụmụ. Ụmụ ha bịara sie ezigbo ike, na-etigbu ndị mmadụ. Ha na-emesi ndị mmadụ ike. Jehova ekweghị ka ha mere ihe ọjọọ ndị ahụ na-aga. N’ihi ya, o kwuru na ya ga-eji mmiri bibie ndị na-eme ihe ọjọọ.
Ma, o nwere otu nwoke dị iche. Ọ hụrụ Jehova n’anya. Aha ya bụ Noa. O nwere nwaanyị na ụmụ atọ. Aha ụmụ ya bụ Shem, Ham, na Jefet. Ụmụ ya atọ a lụkwara nwaanyị. Jehova gwara Noa ka ọ rụọ nnukwu ụgbọ. Ụgbọ a bụ nnukwu igbe nwere ike ise n’elu mmiri, nke ya na ezinụlọ ya ga-anọ n’ime ya ka mmiri ahụ ghara igbu ha. Jehova gwakwara Noa ka o webata ọtụtụ ụmụ anụmanụ n’ime ụgbọ ahụ ka ha gharakwa ịnwụ.
Noa malitere ịrụ ụgbọ ahụ ozugbo. O were Noa na ezinụlọ ya ihe dị ka afọ iri ise ịrụcha ya. Ha rụrụ ya otú ahụ Jehova gwara ha rụọ ya. N’oge Noa na-arụ ụgbọ ahụ, ọ nọ na-agwa ndị mmadụ na Jehova ga-eji mmiri bibie ụwa. Ma ha egeghị ya ntị.
Olee ihe Noa na ezinụlọ ya mechara mee mgbe ha rụchara ụgbọ ahụ? Anyị ga-amata n’isiokwu nke isii.
“Dị nnọọ ka ụbọchị Noa dịrị, otú ahụ ka ọnụnọ Nwa nke mmadụ ga-adị.”—Matiu 24:37
Isiokwu A Nwekwara Ike Ịmasị Gị
KAADỊ AKỤKỌ NDỊ DỊ NA BAỊBỤL
Kaadị Akụkọ Noa
Ị̀ ma aha ụmụ atọ Noa mụrụ? Chọpụtakwuo ihe ndị ọzọ gbasara Noa na ezinụlọ ya.
KATUUN NDỊ E SERE ESE E JI AKỤZI BAỊBỤL
Noa Nwere Okwukwe na Chineke
Chineke gwara Noa ka ọ rụọ ụgbọ iji zọpụta ezinụlọ ya. Gịnị ka ị mụtara gbasara okwukwe n’akụkọ Noa na iju mmiri ahụ?
