Nọ oke o be nyaharo na, ahwo a tẹ te vọ akpọ na. Yọ ahwo buobu a je ru eware iyoma. Makọ ijẹle jọ dede a je ru eware iyoma re. A no obọ odhiwu ziọ obọ otọakpọ obonẹ te rria. Kọ whọ riẹ oware nọ a ro ru ere? A zihe ruọ ahwo-akpọ re a sae wo eyae kẹ omarai.

Eyae na i te yẹ emọ kẹ ijẹle na. Emọ nọ a yẹ na e jọ ruaro yọ a wo ogaga. Fikiere a jẹ rọ ogaga rai gwọlọ ẹme. A je ru ozighi. Jihova ọ sae kẹ eware iyoma itieye na uvẹ vievie he. Fikiere ọ tẹ jiroro nọ ọ rẹ rọ ame raha ahwo oyoma na no.

Rekọ ọzae jọ ọ jariẹ nọ o wo ohẹriẹ no ahwo nọ a kiọkọ. O you Jihova gaga. Odẹ riẹ Noa. O wo aye gbe emezae esa, odẹ rai Shẹm, Ham, gbe Jafẹt, yọ emezae esa na a wo ọvuọ aye riẹ. Jihova ọ tẹ ta kẹ Noa nọ o ku okọ ulogbo jọ, re ọyomariẹ avọ ahwo uviuwou riẹ a sae zọ evaọ okenọ Owhe na o te ku ze. Okọ na o wọhọ etehe ologbo nọ ọ rẹ sai vori evaọ ehru ame. Jihova ọ tẹ jẹ ta kẹ Noa nọ o su erao buobu ruọ okọ na re e zọ re.

Noa ọ tẹ nwani mu okọ na họ eku. O rehọ Noa avọ uviuwou riẹ oware wọhọ ikpe 50 soso re a te ku okọ na re. Nwanọ epanọ Jihova ọ ta nọ a ku okọ na, ere a ku rie. Evaọ oke yena, Noa ọ jẹ vẹvẹ ahwo na unu kpahe Owhe na. Rekọ ohwo ọvo ọ gaviezọ họ.

Oke nọ a rẹ rọ ruọ evaọ okọ na u te te. Joma ruẹ oware nọ o via..