DILONGI 5
Maswa ya Noa
Na nima, bantu kumaka mingi na ntoto. Bamingi vandaka bantu ya mbi. Ata bawanzio ya nkaka ya zulu kumaka bawanzio ya mbi. Bo bikaka bisika na bo ya kuzinga na zulu mpi bo kulumukaka na ntoto. Keti nge me zaba sambu na nki bo salaka yo? Sambu bo baka nitu ya kimuntu mpi bo kwela bankento.
Bawanzio ti bankento yina butaka bana. Ntangu bana yango yelaka, bo kumaka ngolo mpi bo vandaka kuniokula bantu. Bo vandaka kupesa bantu mpasi. Yehowa lendaka ve kubika nde mambu yina landa kusalama. Yo yina yandi bakaka lukanu ya kufwa bantu ya mbi na mvula ya ngolo.
Kansi vandaka ti muntu mosi ya kuswaswana. Yandi vandaka kuzola Yehowa. Zina na yandi Noa. Yandi vandaka ti nkento mpi bana tatu ya babakala, Semi, Kami, ti Yafeti; konso muntu vandaka ti nkento na yandi. Yehowa songaka Noa na kutunga maswa ya nene sambu yandi ti dibuta na yandi kuguluka na Mvula ya Ngolo. Maswa kele kesi ya nene yina lenda tambula na zulu ya masa. Yehowa songaka mpi Noa na kukotisa bambisi na maswa sambu bo mpi kuguluka.
Noa yantikaka kutunga maswa kukonda kusukinina. Noa ti dibuta na yandi bakaka bamvula kiteso ya 50 sambu na kutunga maswa yina. Bo tungaka maswa kaka mutindu Yehowa songaka bo na kusala. Na ntangu yina, Noa vandaka kukebisa bantu sambu na Mvula ya Ngolo. Kansi, ata muntu mosi ve waka yandi.
Nsuka-nsuka, ntangu ya kukota na maswa lungaka. Beto tala mambu yina salamaka na nima.
“Kaka mutindu bilumbu ya Noa vandaka, kukala ya Mwana ya muntu ta vanda mpi mutindu mosi.”—Matayo 24:37
Nge Lenda Sepela Mpi Ti
MASOLO YA BIBLIA NA BIFWANISU
Noa Vandaka ti Lukwikilu na Nzambi
Noa landaka bantuma ya Nzambi yo yina yandi tungaka maswa sambu na kugulusa dibuta na yandi na Mvula ya Ngolo. Inki dilongi nge lenda baka na yina me tala kukwikila na Nzambi na disolo ya Noa mpi ya Mvula ya Ngolo?
