Ovanhu ova li va enda tava hapupala kombada yedu mokweendela ko kwefimbo. Vahapu vomuvo ova li hava longo owii. Nokuli novaengeli vamwe meulu ova ka ninga ovakolokoshi. Ova li va fiya po eenhele davo meulu ndele tave uya kombada yedu. Mbela ou shii kutya omolwashike va li va ningila ngaho? Opo va lundulukile momalutu opanhu nova dule okuhombola novakainhu.

Ovaengeli ova li va dala ounona novakainhu kombada yedu. Eshi ounona ovo va enda tava kulu, ova li va ninga ovanaenghono, ovakwanyanya nova li hava hepeke ovanhu. Jehova ka li ta dulu okweefa elihumbato la tya ngaho li twikile. Okwa li a tokola okuhanauna po ovakolokoshi neyelu.

Ashike okwa li omulumenhu umwe wedina Noa, oo a li ha longo ouwa noku hole Jehova. Okwa li e na omukulukadi novanamati vatatu, Sem, Ham naJafet. Ovanamati vaye navo ova li ve na ovakulukadi vavo. Opo nee Jehova okwa li a lombwela Noa a tunge onguluwato inene opo a dule okuxupa mEyelu pamwe novaneumbo laye. Onguluwato oyo oshinima tashi monika sha fa oshipakete shinene osho tashi dulu okukaama kombada yomeva. Okwa li yo a lombwela Noa a twale oinamwenyo ihapu monguluwato opo nayo i dule okuxupa.

Diva, Noa okwa li a tameka okutunga onguluwato. Osha li sha pula omido 50 lwaapo opo Noa novaneumbo vaye va mane okutunga ongulu oyo. Ova li ve i tunga naanaa ngaashi Jehova e va lombwela. Pefimbo opo, Noa okwa li a londwela ovanhu shi na sha nEyelu olo la li tali ke uya, ndele kava li va pwilikina kuye.

Lwanima, efimbo lokuya monguluwato osho la fiki. Natu ka taleni kutya oshike sha ka ningwa po konima yaasho.