As tɛm de go, pipul dɛn bɔku na di wɔl. Bɔku pan dɛn na bin bad pipul dɛn. Ivin sɔm pan di enjɛl dɛn bin tɔn bad enjɛl dɛn. Dɛn lɛf usay dɛn bin de na ɛvin ɛn kam dɔŋ na di wɔl. Yu sabi wetin mek dɛn du dat? Na bikɔs dɛn bin want fɔ tek mɔtalman bɔdi ɛn mared uman dɛn.

Di enjɛl dɛn ɛn di uman dɛn bɔn bɔypikin dɛn. Dɛn bɔypikin dɛn de kam fɔ gɛt trɛnk, ɛn dɛn bin de tek advantej pan pipul dɛn. Dɛn bin de du bad bad tin dɛn to pipul dɛn. Jiova nɔ go alaw dɛn tin dɛn de fɔ kɔntinyu fɔ apin. So i disayd fɔ dɔnawe wit di bad pipul dɛn bay we i mek wan ebi ebi ren kam.

Bɔt wan man bin de we difrɛn. I bin lɛk Jiova. Dis man na bin Noa. I bin gɛt wan wɛf ɛn tri bɔypikin dɛn we nem Shɛm, Am, ɛn Jefɛt, ɛn dɛn ɔl tri bin gɛt wɛf dɛn. Jiova tɛl Noa fɔ bil wan big big ak so dat in ɛn in famili go sev we di ebi ebi ren kam. Ak na wan big bɔks we de flot pantap wata. Jiova tɛl Noa bak fɔ briŋ bɔku animal dɛn insay di ak so dat dɛn bak go sev.

Wantɛm wantɛm, Noa bigin fɔ bil di ak. Noa ɛn in famili bin tek lɛk 50 ia so fɔ bil am. Dɛn bil di ak jɔs lɛk aw Jiova tɛl dɛn fɔ bil am. Insay da tɛm de, Noa bin de wɔn di pipul dɛn bɔt di ebi ren we gɛt fɔ kam. Bɔt nɔbɔdi nɔ lisin to am.

Faynali, di tɛm rich fɔ mek dɛn go insay di ak. Lɛ wi si wetin bin apin afta dat.