တၢ်မၤလိ ၅
စီၤနိအၤတ့ထီၣ်ကဘီ
လၢခံ ပှၤဟီၣ်ခိၣ်ဖိအါထီၣ်ဝဲလၢ ဟီၣ်ခိၣ်ချၢဒီး အဝဲသ့ၣ်အါတက့ၢ်န့ၣ် မၤတၢ်အၢတၢ်သီလီၤ. မူခိၣ်ကလူးတနီၤန့ၣ် စးထီၣ်မၤဝဲတၢ်အၢတၢ်သီစ့ၢ်ကီးလီၤ. မူခိၣ်ကလူးတဖၣ်အံၤပာ်တ့ၢ်ကွံာ် အတၢ်အိၣ်တၢ်ဆိးအလီၢ်လၢမူခိၣ်ဒီး ဟဲလီၤဆူဟီၣ်ခိၣ်ချၢလီၤ. ဘၣ်မနုၤအဃိ အဝဲသ့ၣ်ဟဲလီၤလၢ ဟီၣ်ခိၣ်ချၢလဲၣ်. အဝဲသ့ၣ်မၤကဲထီၣ်အသးဒ် ပှၤဟီၣ်ခိၣ်ဖိအက့ၢ်အဂီၤအသိး ဒီးဟံးန့ၢ်အမါလၢ ပှၤဟီၣ်ခိၣ်ဖိလီၤ.
မူခိၣ်ကလူးတဖၣ်အမါန့ၣ် အိၣ်ဖျဲၣ်ထီၣ်ဝဲအဖိတဖၣ်လီၤ. ဖဲအဝဲသ့ၣ်အဖိခွါတဖၣ်ဒိၣ်ထီၣ်အခါ အဂံၢ်ဆူၣ်ဘါဆူၣ်ဒီး မၤနၢၤအီၣ်ပှၤဂၤလီၤ. ဒီးအဝဲသ့ၣ်မၤဘၣ်ဒိဘၣ်ထံးပှၤဂၤစ့ၢ်ကီးလီၤ. ယဟိဝၤယွၤဟ့ၣ်အခွဲးလၢ တၢ်အၢတၢ်သီတဖၣ် ကအိၣ်လၢဟီၣ်ခိၣ်ချၢတသ့လၢၤဘၣ်. အဃိ ကစၢ်ယွၤဆၢတဲာ်လီၤအသးလၢ ကမၤဟးဂီၤကွံာ်ပှၤအၢပှၤသီတဖၣ် လၢထံန့ၣ်လီၤ.
ဘၣ်ဆၣ် လၢပှၤအၢပှၤသီအကျါန့ၣ် ပှၤဂ့ၤအိၣ်ဝဲတဂၤလီၤ. အမံၤမ့ၢ်စီၤနိအၤဒီး အဝဲမ့ၢ်ပှၤတဂၤလၢ အဲၣ်ယဟိဝၤယွၤလီၤ. အဝဲအိၣ်ဒီးအမါဒီး အဖိခွါသၢဂၤလီၤ. အဖိခွါသၢဂၤအံၤ အမံၤမ့ၢ်ဝဲ စီၤၡ့ၣ်, စီၤဃၣ်ဒီး စီၤယ့ဖ့းသးလီၤ. ဒီးအဖိခွါကိးဂၤဒဲးန့ၣ် အိၣ်ဒီးအမါလီၤ. ယဟိဝၤယွၤမၢ စီၤနိအၤတ့ထီၣ်ကဘီဖးဒိၣ်တဘ့ၣ်လၢ အလီၤဂာ်ဒီးတလါဖးဒိၣ်တဖျၢၣ်လီၤ. ဖဲထံလုၢ်ဘၢတၢ်အခါ ကဘီဖးဒိၣ်အံၤ ကထီၣ်ဖီလၢထံဖီခိၣ်ဒ်သိး စီၤနိအၤဒီး အဟံၣ်ဖိဃီဖိကပူၤဖျဲးဝဲအဂီၢ်လီၤ. ဒီးယဟိဝၤယွၤတဲဘၣ်စ့ၢ်ကီး စီၤနိအၤလၢ ကကိးနုာ်လီၤဝဲဆၣ်ဖိကီၢ်ဖိတဖၣ်လၢ ကဘီအပူၤဒ်သိး ကပူၤဖျဲးဝဲအဂီၢ်လီၤ.
တဘျီဃီန့ၣ် စီၤနိအၤစးထီၣ်တ့ထီၣ်ဝဲ ကဘီဖးဒိၣ်တဘ့ၣ်လီၤ. စီၤနိအၤဒီး အဟံၣ်ဖိဃီဖိန့ၣ် တ့ထီၣ်ကဘီယံာ်ဝဲအနံၣ် ၅၀ ဃၣ်ဃၣ်လီၤ. အဝဲသ့ၣ်တ့ထီၣ်ကဘီဒ် ယဟိဝၤယွၤတဲဘၣ်အဝဲသ့ၣ်အသိးလီၤ. ဒီးဖဲန့ၣ်အဆၢကတီၢ် စီၤနိအၤဟ့ၣ်ပလီၢ်စ့ၢ်ကီးပှၤဂၤလၢ ထံကလုၢ်ဘၢဟီၣ်ခိၣ်န့ၣ်လီၤ. ဘၣ်ဆၣ် ပှၤတဒိကနၣ် အတၢ်ကစီၣ်နီတဂၤဘၣ်.
ခဲအံၤ တၢ်ဆၢကတီၢ်ဘၣ်လၢ စီၤနိအၤဒီးအဟံၣ်ဖိဃီဖိ ကနုာ်လီၤလၢကဘီအပူၤလီၤ. တၢ်ကမၤအသးဒ်လဲၣ်န့ၣ် ပကမၤလိအါထီၣ်လၢ တၢ်မၤလိလၢခံတခါအပူၤလီၤ.
“ဒ်တၢ်မၤအသးလၢ စီၤနိအၤ အမုၢ်နံၤတဖၣ်အသိးန့ၣ်, တုၤပှၤကညီဖိခွါအံၤဟဲလီၤဒီး, တၢ်ကမၤအသးဒ်န့ၣ်အသိးလီၤ.”—မးသဲ ၂၄:၃၇
