Awˬ yanˇ peuˬ kʼai htaˇ, miˬ guiˬ hkʼoˆ chaw yaˇ maˇ la ve yoˬ. Yaꞈ hkʼaˇ, maˇ˗awˍ ve lehˬ haiˬ ve chaw hpehꞈ ve yoˬ. Mvuhˇ naw ma tcuh yaˇ teˇ hpaˍ hpaˍ htawˇ haiˬ ve yoˬ. Yawˇ hui ve chehˇ kuiˬ mvuhˇ naw ma hkʼoˆ baˬ taˉ leh miˬ guiˬ hkʼoˆ yaꞈ la ve yoˬ. Aˬ htoꞈ ma te yawˇ hui chi hkʼe te ve le shiˍ˗aˬ laˇ? Yawˇ hui chaw yaˇ hkʼe leˇ ve awˬ to cawˬ gaˇ leh miˬ guiˬ hkʼoˆ lo ve yaˇ miˇ haˉ htaꞈ ca heuˆ la ve yoˬ.

Maˇ daꞈ ve mvuhˇ naw ma tcuh yaˇ miˬ guiˬ hkʼoˆ ve yaˇ miˇ htaꞈ heuˆ la leh yaˇ paˍ paw la ve yoˬ. Yawˇ hui ve yaˇ paˍ uiˍ la leh awˬ gʼaˇ uiˍ jaˇ. Yaˇ paˍ teˇ hpaˍ shu htaꞈ dawˆ daꞈ yaꞈ daꞈ ve yoˬ. Awˬ ceuˬ chi hkʼe ve htaꞈ Yaˬhoˉvaˬ maˇ kʼawꞈ hpehꞈ tcuh gaˇ. Chi htaꞈ pa taw, maˇ daꞈ ve chaw hkʼa peu˗eˬ htaꞈ te luˬ tuˬ miˬ guiˬ htaꞈ iˉ kaˆ htonˍ piˇ tuˬ yoˬ tehꞈ Yaˬhoˉvaˬ dawˇ cheˆ taˍ ve yoˬ.

Yaꞈ hkʼaˇ, shu htaꞈ maˇ shuˍ ve hawˉ hkʼaˆ teˇ gʼaˇ cawˬ ve yoˬ. Yawˇ Noˉaꞈ meh leh Yaˬhoˉvaˬ htaꞈ haꞈ ve yoˬ. Yawˇ awˬ miˇ ma teˇ gʼaˇ tiˉ cawˬ leh yawˇ hui ve yaˇ paˍ 3 gʼaˇ lehˬ Sheˍmaˆ, Haˍmaˆ, Yaˍhpehˆ meh ve yoˬ. Yawˇ hui 3 gʼaˇ kaꞈ awˬ miˇ ma cawˬ ve yoˬ. Iˉ kaˆ htonˍ ve htaꞈ Noˉaꞈ leh yawˇ ve yehˬ kʼa ponˬ gʼa tuˬ, Yaˬhoˉvaˬ Noˉaꞈ htaꞈ haw loꞈ kʼoˍ lonˉ teˇ maˬ te tcuh ve yoˬ. Noˉaꞈ ve haw loꞈ kʼoˍ lehˬ suhˆ te taˍ ve, awˬ po kʼoˍ lonˉ hkʼe hpehꞈ leh awˇ ceˍ awˇ naˍ cawˬ leh iˉ kaˆ hkʼoˆ lo chehˇ gʼa ve yoˬ. To nuˇ to shaˆ gʼa ponˬ tuˬ yawˇ hui geh haw loꞈ kʼoˍ hkʼaw yuˬ keu˗o tehꞈ Yaˬhoˉvaˬ Noˉaꞈ htaꞈ kʼoˆ piˇ ve yoˬ.

Noˉaꞈ haw loꞈ kʼoˍ laꞈ haˉ tanˬ te ve yoˬ. Noˉaꞈ leh yawˇ ve yehˬ kʼa haw loꞈ kʼoˍ te ve awˬ yanˇ 50 hkʼawꞈ yehˇ ve yoˬ. Yawˇ hui Yaˬhoˉvaˬ kʼoˆ piˇ ve hkʼe teˇ ceuˬ le le te ve yoˬ. Chi hkʼoˆ kaꞈ, awˬ yanˇ oˇ ve awˬ hkʼaw lo iˉ kaˆ htonˍ la tuˬ Noˉaꞈ shu htaꞈ kaꞈ shaˍ tiꞈ ca piˇ ve yoˬ. Yaꞈ hkʼaˇ, yawˇ ve hkawˇ htaꞈ chaw teˇ gʼaˇ kaꞈ maˇ na.

Teˇ nyi gaˬ leh haw loꞈ kʼoˍ hkʼaw loꞈ˗e ve awˬ yanˇ gaˬ la ve yoˬ. Aˬ htoꞈ ma kʼawꞈ hpehꞈ la ve teˇ geh nyi sheˍ.