LITEYA 5
Masuwa ya Noa
Nsima ya bambula, bato bakómaki ebele na mabele. Mingi na bango bazalaki bato mabe. Ata baanzelu mosusu na likoló bakómaki mabe. Batikaki bisika na bango na likoló mpe bakitaki na mabele. Oyebi mpo na nini basalaki bongo? Mpo bálata nzoto ya mosuni mpe bábala basi.
Baanzelu yango ná basi oyo bazwaki babotaki bana mibali. Bana yango bazalaki bato ya makasi mingi mpe bakómaki bato ya nko. Bazalaki konyokola bato. Yehova akokaki kotika makambo ezala kaka ndenge wana te. Azwaki mokano ya kotinda Mpela (konɔkisa mbula makasi) mpo na koboma bato mabe.
Kasi ezalaki na moto moko ya malamu. Azalaki kolinga Yehova. Nkombo na ye ezalaki Noa. Azalaki na mwasi ná bana mibali misato: Seme, Kame, ná Yafete, mpe bana yango nyonso misato babalaki. Yehova ayebisaki Noa atonga masuwa moko ya monene mpo ye ná libota na ye bábika na Mpela. Masuwa yango ezalaki sanduku moko ya monene oyo ekoki kotepatepa na mai. Yehova ayebisaki mpe Noa akɔtisa banyama na masuwa mpo na kobikisa mpe yango.
Noa abandaki mbala moko kotonga masuwa. Noa ná libota na ye basalaki mosala yango mbula soki 50. Batongaki masuwa yango kaka ndenge Yehova ayebisaki bango. Noa azalaki mpe koyebisa bato ete Mpela ekoya. Kasi moto moko te ayokelaki ye.
Nsukansuka, ntango ya kokɔta na masuwa ekokaki. Tótala likambo oyo esalemaki.
“Ndenge ezalaki na mikolo ya Noa, kozala ya Mwana ya moto ekozala mpe bongo.”—Matai 24:37
Talá mpe...
BATO OYO BIBLIA ELOBELI
Lokasa oyo elobeli Noa
Oyebi nkombo ya bana misato ya Noa? Yekolá makambo mosusu oyo etali Noa mpe libota na ye.
MASOLO YA BIBLIA NA BILILINGI
Noa azalaki na kondima epai ya Nzambe
Noa atongaki masuwa ndenge Nzambe ayebisaki ye mpo na kobikisa libota na ye na Mpela. Lisolo ya Noa mpe Mpela ekoki koteya yo nini na ntina etali kozala na kondima epai ya Nzambe?
BAVIDEO
Noa: Atambolaki elongo na Nzambe
Noa amonisaki kondima makasi na mokili ya mobulu liboso ya Mpela. Talá ndenge makambo oyo basalaki ememeli biso nyonso matomba.
