Hamulaho wa nako, kwaba batu babañata fa lifasi. Buñata bwabona nebaeza lika zemaswe. Mane nihaiba mangeloi amañwi mwa lihalimu naakalile kueza lika zemaswe. Naazwile kwa lihalimu ni kushetumukela fa lifasi. Kana mwaziba libaka hanaaezize cwalo? Naaezize cwalo kuli aipetule kuba batu babanani mibili ya nama ilikuli anyale basali.

Mangeloi ao anyala basali ni kupepa bana. Bana bao baba baana baba maata, hasamulaho baba makwenyepa. Nebautwisanga batu butuku. Jehova naasika tuhelela lika zemaswe zeo kuzwelapili kuezahala. Kacwalo, alela kuyundisa batu babamaswe fa muunda.

Kono nekunani muuna yanaashutana ni babañwi kaufela. Naalata Jehova. Libizo lahae neli Nuwe. Naanani musali ni bana babalaalu babashimani ili, Sema, Kama, ni Jafeta, mi yomuñwi ni yomuñwi wa bana ba Nuwe naanani musalaa hae. Jehova abulelela Nuwe kuyaha aleka yetuna ilikuli yena ni lubasi lwahae bapiliswe kwa Muunda. Aleka ki mbokisi yetuna yekona kucimbauka fa mezi. Jehova hape naabulelezi Nuwe kubeya lifolofolo zeñata mwa aleka ilikuli ni zona lipiliswe kwa Muunda.

Honafo feela, Nuwe akala kuyaha aleka. Nuwe ni lubasi lwahae nebatandile lilimo zebato eza 50 kuli bafeze kuyaha aleka. Nebayahile aleka ka kuya ka mwanaa babulelezi Jehova. Ka nako yeo, Nuwe naalemusize batu ka za Muunda. Kono hakuna yanaateelelize ku yena.

Nako yafita ya kuli bakene mwa aleka. Haluboneñi zeneezahezi hasamulaho.