KIFUNDWA 5
Safina ya Noa
Mwenda mafuku, bantu bāikele bavule pano pa ntanda. Bantu bangi bādi babi. Enka ne bamwikeulu bamo mūlu bāikele babi. Bātambile mūlu bāiya pano pa ntanda. Le uyukile byobāile kulonga? Bāile kuvwala ngitu ya bantu ne kusonga bana-bakaji.
Bano bamwikeulu bābutwile bana na bano bana-bakaji. Bano bana pa kutama bāikele bakomo bininge ne kwikala babipalapala. Bādi basusula bantu. Yehova kādipo ubwanya kuleka bino bintu byendelele kulongeka. O mwanda wātongele konakanya bantu babi ku dilobe.
Inoko kudi muntu umo wādi mwishile nabo. Wādi usenswe Yehova. Dijina dyandi i Noa. Wādi na mukaji umo ne bana basatu, ba Shema, Hama, ne Yafeta, kadi abo bonso bādi na bakaji. Yehova wāsoñenye Noa ōbake Safina mikatampe, mwanda wa aye ne kisaka kyandi bapande ku Dilobe. Safina i sanduku mukatampe ubwanya kulela pa mema. Kadi Yehova wāsoñenye Noa atweje banyema bavule mu Safina mwanda wa nabo bapande.
Bukidi bonka, Noa wāshilula kūbaka Safina. Noa ne kyandi kisaka bāubakile Safina mu bula bwa myaka isenselela ku 50. Bāubakile Safina monka mwēbasoñaninye Yehova. Pobādi bōbaka, Noa wādi udyumuna bantu mwanda wa Dilobe. Inoko i kutupu muntu nansha umo wāmutejeje.
Mfulo mfulō, kitatyi kyābwana kya kutwela mu Safina. Tusa kuyuka myanda mikwabo mu shapita ulonda’ko.
“Monka mwādi mwikadile mafuku a Noa, ne kitatyi kya kwikala’po kwa Mwanā muntu nakyo kikekalanga’nka nabya.”—Mateo 24:37
Tala'po Bidi ne Bino:
MAVIDEO
Noa—Wānangile na Leza
Noa wālombwele kimfwa kya lwitabijo lukomo mu ntanda ya buñumauma ya kumeso kwa Dilobe. Tala bilongwa byandi mobitukwashisha batwe bonso dyalelo.
