Mosmos, ji nochako bedo mang’eny e piny. Ng’eny ji ne timo gik maricho. Kata mana malaike moko e polo bende nobedo maricho. Malaike marichogo nodar e polo ma gibiro e piny. Be ing’eyo gimomiyo ne gitimo kamano? Ne gidwaro ni gibed kaka dhano mondo gikend mon ma ne nie piny.

Malaikego nonyuol gi mon-go. Yawuotgi nobedo roteke ahinya kendo ne gihero goyo ji. Ne gihinyo ji. Jehova ne ok nyal ling’ aling’a to gik marichogo timore. Omiyo, nong’ado ni ne odhi kelo Ataro kata koth maduong’ ma ne dhi tieko joma richo duto.

Kata kamano, ne nitiere ng’at moro ma ne opogore ahinya. Ng’atno nohero Jehova. Nyinge ne en Noa. Noa ne nigi chiege kaachiel gi yawuote adek ma ne gin Shem, Ham, gi Jafeth, kendo yawuotego bende ne nigi mon. Jehova nonyiso Noa mondo oger yie maduong’ ma ne dhi rese gi joode e Ataro ma ne birono. Yie ma ne Noa dhi gero ne en sanduk mang’ongo ma ne nyalo lewore e wi pi. Jehova nonyiso Noa ni orwak le mang’eny mopogore opogore e i yie mondo gin be oresgi.

Kanyo-kanyo, Noa nochako gero yie. Noa gi joode notieko gedo bang’ higni 50 kama. Ne gigere mana kaka Jehova nonyisogi ndi! Kinde ma ne gidhi nyime gi gedo, Noa ne siemo ji e wi Ataro ma ne birono. Kata kamano, ji ne otamore winjo.

Gikone, sa mar donjo e i yie nochopo. We wane ane gima ne otimore bang’ mano.