Tej tbʼet ambʼil, ten nim xjal twitz txʼotxʼ. Chʼixme kykyaqil xjal nya bʼaʼnqetoq. Axpe ikx e ok junjun anjel te nya bʼaʼn. Kyaj kytzaqpiʼn kyaʼj, aju kynajbʼil, ex e kuʼtz twitz Txʼotxʼ. ¿Ojtzqiʼn tuʼna tiquʼn? Tuʼn tten kyxmilal ik tzeʼn kye xjal ex tuʼn kymojeʼ kyukʼil xuʼj.

E tzaj kykʼwaʼl anjel lu kyiʼj xuʼj. Tej kychʼiy kʼwaʼl lu, ten nim kyipumal ex e ok te bʼiyel, in noktoq kybʼinchaʼn nya bʼaʼn kyiʼj xjal. Melaytoq txi tqʼoʼn Jehová ambʼil te jlu tuʼn kukx tikʼ. Kyjuʼtzun bʼaj t-ximen tuʼn kykubʼ tnajsaʼn qeju nya bʼaʼn tukʼil jun nim jbʼal, aju tuʼn tnoj twitz tkyaqil txʼotxʼ tuʼn aʼ.

Noqtzun tuʼnj, attoq jun tbʼanel xjal aju kʼujlaʼntoq Jehová tuʼn. Noé tbʼi. Attoq jun t-xuʼjil ex oxe tkʼwaʼl: aju Sem, Cam ex Jafet kybʼi. Teyele te junjun tkʼwaʼl attoq kyxuʼjil. Xi tqʼamaʼn Jehová te Noé tuʼn tkubʼ tbʼinchaʼn jun ark, jun matij kajontoq jlu bʼinchan tiʼj tzeʼ aju jakutoq jaw iqen tuʼn aʼ. Iktzun tten, jakutoq che kyaj anqʼin Noé kyukʼil toj tja aj ttzaj Nim Jbʼal. Ax ikx xi tqʼamaʼn Jehová te tuʼn kyokx tqʼoʼn nimku txkup toj, tuʼntzun kyklet.

Ok ten naj Noé bʼinchal ark. Xilo tiʼn 50 abʼqʼi tuʼn tbʼant jlu tuʼn kyukʼil toj tja ex kubʼ kybʼinchaʼn ikxix tzeʼn otoq txi tqʼamaʼn Jehová kye. Kyoj qe abʼqʼi lu, xi tqʼamaʼn Noé kye xjal qa oktoq tzul Nim Jbʼal, noqtzun tuʼnj, mi aʼlx xi bʼin te.

Pontzun ambʼil tuʼn kyokx toj ark. ¿Taja tuʼn tok tbʼiʼna tiʼ bʼaj yajxitl?