Ni̱ya̱ʼa tiempo, ki̱xaʼá íyo ku̱a̱ʼání na̱ yiví nu̱ú ñuʼú, soo nina ña̱ va̱ása va̱ʼa xi̱keʼéna. Nda̱a̱ sava na̱ ángel ki̱xaʼána kéʼéna ña̱ va̱ása va̱ʼa. Sa̱ndákoona ndiví ta nda̱kundoona nu̱ú ñuʼú yóʼo. ¿Á xíni̱ún nda̱chun ke̱ʼéna ña̱yóʼo? Ña̱ va̱ʼa koona nda̱a̱ táki̱ʼva íyo na̱ ta̱a ta tindaʼa̱na xíʼin ná ñaʼá.

Ni̱xi̱yo ku̱a̱ʼá se̱ʼe na̱ ángel xíʼin ná ñaʼá, ta na̱yóʼo ndakúní ni̱xi̱yona ta i̱xandi̱va̱ʼana xíʼin na̱ yiví. Jehová kǒo nítaxira keʼékana ña̱yóʼo, ña̱kán sa̱ndíʼi-xa̱ʼarana tá ko̱on sa̱vi̱ kini.

Soo ni̱xi̱yo iin ta̱a ta̱ kǒo níkeʼé ña̱ xi̱keʼé na̱yóʼo chi xi̱kuʼvi̱-inira xi̱xinira Jehová. Ta̱yóʼo xi̱naníra Noé ta ni̱xi̱yo ñá síʼíra xíʼin u̱ni̱ se̱ʼera: ta̱ Sem, ta̱ Cam xíʼin ta̱ Jafet, ni̱xi̱yo ñá síʼí u̱ni̱ saá ta̱yóʼo. Jehová ni̱ka̱ʼa̱nra xíʼin ta̱ Noé ña̱ keʼéra iin arca, táki̱ʼva koo iin caja káʼnu saá koonú ña̱ va̱ása ki̱ʼvinú ini ti̱kui̱í, tasaá ka̱ku ta̱ Noé xíʼin na̱ veʼera. Ta ni̱ka̱ʼa̱n Jehová xíʼinra ña̱ taánra ku̱a̱ʼání kití ña̱ va̱ʼa ná kǒo kuvirí.

Ta̱ Noé kamaní ki̱xaʼára i̱xava̱ʼara tú arca, 50 ku̱i̱ya̱ ke̱ʼénanú, nda̱a̱ táki̱ʼva ni̱ka̱ʼa̱n Jehová saá ke̱ʼénanú. Saátu na̱túʼunra xíʼin na̱ yiví ña̱ koon sa̱vi̱ kini soo ni iinna kǒo níkandíxa ña̱ ni̱ka̱ʼa̱nra.

Vitin xa̱a̱ ki̱xa̱a̱ ki̱vi̱ ña̱ ki̱ʼvina ini tú arca. ¿Á kúni̱ún kunda̱a̱-iniún ndáaña ku̱u tándi̱ʼi?