Teipa, tlauel momiakilijkej maseualmej ipan Tlaltipaktli. Miakej kichiuayayaj tlen amo kuali. Sekij iluikaeuanij nojkia kichijkej tlen amo kuali. Ayokmo kinejkej itstosej ne iluikak, uan ualajkej ipan Tlaltipaktli. ¿Tijmati kenke ualajkej? Pampa kinekiyayaj elisej kej tlakamej uan kiampa ueliskiaj mosiuajtisej.

Kema nopa iluikaeuanij mosiuajtijkej, kinpixkej ininkoneuaj. Kema ininkoneuaj moskaltijkej tlauel tetikej mochijkej uan tlauel mosisiniyayaj uan kintlaijiyouiltiyayaj maseualmej. Jehová amo kikauaskia nochipa kiampa ma itstokaj. Yeka mosentlalik kintsontlamiltis katli amo kualmej. Kichiuaskia tlauel ma uetsi atl uan ma tlatemi.

Ipan nopa tonali, itstoya se tlakatl katli kichiuayaya tlen kuali uan kiikneliyaya Jehová. Motokaxtiyaya Noé. Kipixtoya isiua uan eyij ikoneuaj: Sem, Cam uan Jafet. Ikoneuaj kipixtoyaj ininsiuajuaj. Jehová kiiljuik Noé ma kichijchiua se akali, eliskia kej se ueyi kuakajo tlen kichijchiuaskia ika kuauitl uan ueliskia mokauas aixko. Kiampa Noé uan ichampoyouaj ueliskiaj momanauisej kema tlauel uetsiskia atl. Jehová nojkia kinauatik ma kinkalaki ipan akali miakej tlapialmej, kiampa nojkia momanauiskiaj.

Noé uan ichampoyouaj nimantsi pejkej kichijchiuaj nopa akali. Uejkajkej se 50 xiuitl uan kichijkej kej Jehová kiniljuik. Maske Noé nojkia kiniljuiyaya maseualmej toTeotsij kichiuaskia ma uetsi miak atl, amo aka kitlakakilik.

Teipa monejki kalakisej ipan akali. ¿Tijneki tijmatis tlake panok teipa?