Satepan, tlaltikpaktlakamej omomiaktilijkej. Pero miakej okatkaj amo yolkualmej. Hasta sekimej ángeles omochijkej amo yolkualmej. Yejuan okatkaj iluikak pero oualtemokej nikan Tlaltikpak. ¿Tikmati tleka? Omokuepkej tlakamej uan omonamiktijkej iuan siuamej.

Siuamej tlen omonamiktijkej iuan ángeles okinpixkej inkoneuan. Inkoneuan ángeles okatkaj sapanoa chikauakej, okinpaktiaya moteuiskej uan otetlajyouiltiayaj. Jehová amo okitekauili ijkon ma panoto. Ye okatemiti Tlaltikpak ika se chikauak kiauitl uan ijkon okinmixpolo nochtin akinmej amo yolkualmej.

Ijkuakon, noijki okatka se tlakatl yolkuali tlen omotokayotiaya Noé. Ye okitlasojtlaya Jehová. Noé okipiaya isiua uan eyi ikoneuan tlen omotokayotiayaj: Sem, Cam uan Jafet. Yejuan okinpiayaj insiuauan. Jehová okinauati Noé ma kichijchiua se akali. Noé okichijchi nin akali ika kuauitl uan omotaya ken se ueyi caja tlen amo oapolakiaya. Ijkon omomakixtijkej Noé uan ikalchanejkauan. Jehová noijki okinauati Noé ma kinkalaki miakej yolkamej ijtik akali uan ijkon noijki momakixtiskiaj.

Noé san niman opejki kichijchiua akali. Ye uan ikalchanejkauan ouejkajkej kanaj 50 xiuitl okichijchijkej akali uan okichijchijkej ijkon ken Jehová okinnauati. Ijkuakon, Noé okinmilui nochtin tlaltikpaktlakamej ualaskia se chikauak kiauitl, pero amo okikakej.

Saiktlami, Noé, ikalchanejkauan uan yolkamej okalakej ijtik akali. ¿Tikneki tikmatis tlen opanok satepan?