Mokweendela ko kwethimbo aantu oyi indjipala kombanda yevi. Oyendji oya li ye na omikalo omiwinayi. Nokuli naayengeli yamwe megulu oya ningi aawinayi. Oya thigi po ehala lyawo lyokukala megulu e taye ya kombanda yevi. Mbela owu shi kutya oye shi ningile shike? Oye shi ningi, opo ya vule okwiimonena omalutu gopantu nokuhokana aana yaantu.

Aayengeli mboka naakulukadhi yawo oya vala aanona aamati. Aanona mboka sho ya koko oya ningi aanankondo naakwanyanya. Oya li haye ehameke aantu. Jehova ine etha ya tsikile okulonga uuwinayi. Onkee ano, okwa tokola a hanagule po aakolokoshi nEyelu.

Ihe opwa li omulumentu gumwe ngoka inee ya fa. Omulumentu ngoka okwa li e hole Jehova. Edhina lye oNoa. Noa okwa li e na omukulukadhi noyanamati yatatu, Sem, Ham naJafet. Kehe gumwe gwomuyo okwa li e na omukulukadhi. Jehova okwa li a lombwele Noa a tunge onguluwato onene. Oya li onenenene notayi vulu okukaama kombanda yomeya. Okwe shi ningi, opo Noa noyaandjawo ya vule okuya mo pethimbo lyEyelu. Jehova okwa li a lombwele wo Noa a tule iinamwenyo oyindji monguluwato moka, opo nayo yi hupe.

Nziya Noa okwa li a tameke okutunga onguluwato. Noa noyaandjawo oya li ya tungu onguluwato uule womimvo 50 lwaampo. Onguluwato oye yi tungu naanaa ngaashi ya lombwelwa kuJehova. Pethimbo mpoka, Noa okwa li a londodha aantu kombinga yEyelu, ihe kaya li ya pulakene.

Lwahugunina, ethimbo lyokuya monguluwato osho lya thiki. Natu tale kutya oshike sha li sha ningwa po.