Hoolzhishgóó nahasdzáán bikááʼgóó diné ahoolchííł. Ląʼí tʼóó baaʼihgo deeskai. Níłchʼigo ndaalʼaʼí ałdóʼ ákódaadzaa. Nahasdzáán bikáaʼjįʼ adáákai. Ákódajiidzaaígíísh nił bééhózin? Éí nihokáaʼgi sáanii dadiigeh daaníigo diné ádaʼdiilyaa.

Díí níłchʼigo ndaalʼaʼí éí sáanii yił ałhaa nidaaskai áko ashiiké bá nidahaazhchı̨́. Éí ayóó ádabóodziil dóó édaʼatsʼihii daazlı̨́ı̨́ʼ. Diné atídeiłʼı̨́. Jiihóvah éí doo tʼóó yá hoołʼaʼ da. Éí biniinaa diné doo yáʼádaashóonii tó bee ádeeshdįįł niizı̨́ı̨́ʼ.

Hastiin léiʼ łah átʼé. Éí Jiihóvah ayóóʼáyóʼní. Bízhiʼ éí Nóah wolyé. Hweʼasdzą́ą́ hólǫ́ dóó hayeʼké éí tááʼ. Éí Shem, Ham, dóó Jéífeth daolyé. Éí ałdóʼ beʼasdzą́ą́ dahólǫ́. Jiihóvah éí Nóah tsinaaʼeeł ádíílííł yidííniid, áko díí éí Tó Yíląądgo bí dóó baʼáłchíní yiiʼ yisdádoohkah. Ark éí tsinaaʼeeł dikʼą́ągo nineezígíí ayóí áníłtsogo óolyé. Nóah ałdóʼ kóbiʼdooʼniid, naaldlooshii yisdádoohkah biniyé ark biih dííʼish.

Nóah éí tʼáá akǫ́ǫ́ ark yideeshnish. Bí dóó baʼáłchíní ark yindaalnishgo 50 daatsʼí nááhai. Éí Jiihóvah díí átʼéego ark ádadoohłííł yidííniid yę́ęgi átʼéego ádayiilaa. Ákwii nahalzhiishgo, Nóah éí aadę́ę́ʼ Tó Yíląąd níigo yaa halneʼ ndi, diné doo dabíistsʼą́ąʼ da.

Kʼad índa, ark biih jidookahjįʼ ahoolzhiizh. Éí bikéédóó ánááhoodzaaígíí nihił bénádahodoodzįįł.