Mokueenda kuomuwo, ohi aikala novanthu ovanyingi. Ovanyingi puvo ankho valinga ovipuka ovivi. Alo umwe onoandyu mbumwe keulu ambukala onondingavivi. Mbahilepo eumbo liambo keulu ambuya pano pohi. Ove utyii omokonda yatyi mbalingila ngotyo? Omokonda ankho mbuhanda okunepa.

Onoandyu ombo ambukala novana onondingavivi. Etyi ovana ovo vekula avakala no nonkhono ononene. Ankho vaveta ovanthu. Jeova kahandele ovipuka ovio vitualeko okumoneka. Ngotyo ahanyeko onondingavivi Nombila Onene.

Mahi ankho kuna omulume umwe welikalela. Ankho uhole Jeova. Enyina liae o Noe. Ankho una omukai novana vetatu, Sem na Cã na Jafé iya kese umwe ankho una omukai wae. Jeova apopila Noe opo atunge owato umwe omunene, opo ahupe nombunga yae Kombila Onene. Owato ankho ukahi ngo tyikasa tyiyalala kombanda yomeva. Tupu Jeova apopila Noe apake mowato ovinyama opo navio vihupe.

Liwa-liwa, Noe ahimbika okutunga owato. Noe nombunga yae aveitungu momanima 50. Vatunga owato ngetyi Jeova evepopila. Mokueenda kuomuwo oo, Noe alondola ovanthu konthele Yombila Onene. Mahi avehemutavela.

Pahe, omuvo wokunyingila mowato auhikipo. Tutalei etyi tyaendapo.