Mekɛ ɛlɛkɔ la, menli nwo razonle wɔ azɛlɛ ye azo. Ɛnee bɛ nuhua dɔɔnwo le amumuyɛma. Anwumabɔvolɛ bie mɔ bɔbɔ yɛle ɛtane. Bɛvi anwuma bɛrale azɛlɛ ye azo. Ɛze deɛmɔti bɛyɛle zɔhane la ɔ? Bɛhakyile bɛrale azɛlɛ ye azo amaa bɛahola bɛagya mraalɛ.

Anwumabɔvolɛ ne mɔ nee mraalɛ wole. Ngakula ne mɔ anwo yɛle se, na bɛ ti yɛle se. Bɛyɛle awie mɔ asa. Ɛnee Gyihova ɛngulo mɔɔ ɛlɛkɔ zo la. Yemɔti ɔyɛle kɛ ɔfa azuyilɛ yeazɛkye ɛtanevolɛma.

Noko ɛnee nrenyia bie wɔ ɛkɛ mɔɔ ɔle sonlakpalɛ. Ɛnee ɔkulo Gyihova. Bɛfɛlɛ ye Nowa. Ɔ nee ɔ ye wole ngakula mrenyia nsa, Hyɛm, Ham nee Gyeefɛte, na ɛnee biala lɛ ɔ ye. Gyihova zele Nowa kɛ ɔbobɔ ɛlɛne kpole, amaa ɔ nee ye abusua ne anyia ngoane wɔ Azuyilɛ ne anu. Eza Gyihova hanle hilele Nowa kɛ ɔva nane ne mɔ bie ɔhɔ ɛlɛne ne anu amaa bɛanwu.

Ɛkɛ ne ala Nowa bɔle ɔ bo kɛ ɔbobɔ ɛlɛne ne. Ɔ nee ye abusua ne vale ɛvolɛ kɛyɛ 50 a bobɔle ɛlɛne ne a. Bɛbobɔle ɛlɛne ne kɛ mɔɔ Gyihova se bɛyɛ ye la pɛpɛɛpɛ. Eza Nowa hanle Azuyilɛ ne anwo edwɛkɛ hilele menli ne. Noko bɛandie ye.

Akee mekɛ dwule kɛ bɛkɔ ɛlɛne ne anu. Maa yɛnlea edwɛkɛ bieko mɔɔ zile la.