Ọke oru, ihworho ni me buon uvuẹn otọrakpọ na. Buebun aye evwọkon. Emakashe ezẹko ri ha obẹ odjuwu ni kparehaso i Jehova. Aye ni nẹ odjuwu rhiẹ otọrakpọ na. Wu rhe oborẹ ọsoriẹ aye e ru omaran? Aye i ruẹ omaran nẹ aye i sabu wene rhiẹ ituakpọ neneyo aye i sabu rọnmọ emẹse.

Emẹse na ni vwiẹ emọ rẹn emakashe na. Emọ aye ni vwo omẹgbanhon omamọ, aye ne sehiẹn ihworho. Aye a ha ẹkuọn vwe ihworho. Jehova ọ vwọ samọ lẹrhẹ ọnana rha phia ọke ephia-an. Omarana, Jehova no brorhiẹn rọ nọ ha ukude ọduado ghwọghọ evwọkon na.

Ọrẹn, o vwo ọhworhare owu rọ vẹnẹ ihworho ri hẹrhẹre na. Ọhworhare na o vwo ẹguọlọ kpahen i Jehova. Odẹ ye i Noah. O vwo ane owu ọrhẹ emọ ehworhare awansa, edẹ aye yẹ, Shem, Ham ọrhẹ Japheth, emọ awansa na i ji vwo ane owuowu. Jehova ọ ta rẹn i Noah nọ kanren owọ ọduado, neneyo ọye ọrhẹ ekrun ọnẹyen i sabu simirhọ ọke ukude na. Owọ ọnana ọnọ họhọ ekpeti rọ nọ sabu volo oberun ame. Jehova ọ ji ta rẹn i Noah taghene ọ ha eranmo buebun ruẹ owọ na, nẹ aye i ji sabu simirhọ.

Ogege, Noah nọ tuẹn owian owọ ẹkanren na rhọ. Noah ọrhẹ ekrun ọnẹyen, i sabu kanren owọ na hin uvwre ẹgbukpe 50. Aye i kanren owọ na lele oborẹ i Jehova o dje rẹn aye. Uvwre ọke ọrana, Noah ọ ha orhetio rẹn ihworho kpahen ukude na. Ọrẹn, ohworho owuorowu ọ kerhọ ye-e.

Ọke oru, aye ni ruẹ owọ na. Jene yono kpahen oborẹ ọ phiare.